Gjykata Kushtetuese ka nisur sot seancën për shqyrtimin e kërkesës së kryebashkiakut në detyrë të Kavajës, Elvis Rroshi, për shpalljen si anti-kushtetues të vendimit të shkarkimit të tij nga detyra.
Roshi ishte i pranishëm në seancë, ndërsa ka kërkuar që vendimi i KQZ-së për t’i ndërprerë mandatin në kuadër të ligjit të dekriminalizimit të shpallet jo në përputhje me dispozitat e ligjit themeltar të shtetit. Gjithashtu Roshi ka kërkuar edhe shfuqizimin e vendimit të qeverisë për shkarkimin e tij. Por nga ana tjetër përfaqësuesit ligjorë të Kuvendit dhe Qeverisë deklaruan në seancë se kërkesa e Rroshit nuk duhet legjitimuar dhe si pasojë duhet rrëzuar nga Gjykata Kushtetuese.
Avokatët e Elvis Rroshit kanë thënë se Komisioni Qendror i Zgjedhjeve dhe Këshilli i Ministrave kanë shkelur kushtetutën kur kanë marrë vendim për shkarkimin e tij nga detyra në fund të muajit dhjetor të vitit të kaluar raporton BW.
Rroshi është një nga zgjedhurit e parë që u “kap” nga ligji për dekriminalizimin, i miratuar dhjetorin e vitit të shkuar me shumicë votash nga mazhoranca dhe opozita.
Rroshit iu hoq mandati nga KQZ-ja me kërkesë të Prokurorisë, sipas të cilës, ai kishte fshehur një dënim për përdhunim në Itali në fillim të viteve ’90. Komisioni Qendror i Zgjedhjeve në 29 dhjetor vendosi heqjen e mandatit për dy deputetet Shkëlqim Selami dhe Dashamir Tahiri, si dhe kryebashkiakun Elvis Rroshi, pas kishin fshehur të dhënat në formularin e dekriminalizimit.
Për vendimin e KQZ reagoi edhe ambasada amerikane në Tiranë, sipas të cilët ky rast është paralajmërim për të gjithë ata të inkriminuar që mendojnë të kandidojnë në zgjedhjet e ardhshme parlamentare të 18 qershorit.
