Presidenti Nishani ka dërguar këtë të hënë në Gjykatën Kushtetuese kërkesën për intepretimin e nenit 98 të kushtetutës që ka të bëjë me ndryshimet në qeveri. E marta është dhe afati i fundit kushtetues, që Presidenti të miratojë dekretimin e emërimit të dy ministrave të rinj në qeveri, atë të Arben Ahmetajt në krye të financave dhe Milva Ikonomit në drejtim të Ministrisë së Ekonomisë.
Ndërkohë, në një mbledhje të komisionit parlamentar të sigurisë, kreu i komisionit, deputeti i LSI Spartak Braho e ka cilësuar këtë veprim të Nishanit, si një lojë politike të ngjashme me shahun.
“Kreu i shtetit po bën lojë politike, e ngjashme me lojë shahu. Ashtu si në lojën e shahut çdo gjë ka afatet e veta”, tha Braho.
Nishani dekretoi shkarkimin e Ministrit të Financave, Shkëlqim Cani dhe të Ministrit të Zhvillimit Ekonomik, Arben Ahmetaj por nuk dekretoi ndryshimet e tjera në qeveri. Kjo, me arsyetimin se nuk mund të dekretojë dy ministrat e rinj pa kaluar votimi në Parlament i dy dekreteve të tij për shkarkimin e ministrave. Nishani ka thënë se nuk do të dekretojë emërimet e reja, pa patur një vendim të Gjykatës Kushtetuese mbi këtë çështje.
Në kërkesën e tij Nishani thekson:
“Përsa kohë Dekretet e Presidentit për shkarkimin e dy Ministrave nuk janë shqyrtuar nga Kuvendi, do të thotë që ato kanë ngelur pa fuqi. Do të jetë pa kuptim nëse Dekretet për Shkarkimin e Ministrave do të kenë votën kundër të Kuvendit, ndërkohë që Presidenti emëron dy ministra të tjerë referuar propozimit të Kryeministrit. Në rastin konkret, Kuvendi nuk i ka dhënë fuqi Dekreteve të Presidentit për shkarkimin e Ministrave, ndërkohë që Presidenti ka detyrimin kushtetues të shprehet me dekret për emërimin e dy ministrave të tjerë referuar propozimit të Kryeministrit brenda afatit 7 ditor .
Sa më sipër, duke qenë se ekziston një normë kushtetuese e paqartë, ekziston një marrëdhënie e ngushtë mes normës kushtetuese dhe situatës së krijuar dhe duke marrë në konsideratë dhe qëndrimin e mbajtur nga ana e Kryeministrit, dhe Parlamentit, Presidenti i Republikës referuar nenit 124 pika 1, nenit 134 pika 1 shkronja “a” e Kushtetutës i kërkon Gjykatës Kushtetuese të bëjë interpretimin përfundimtar të nenit 98 pika 1.”- argumenton Nishani.
