“Nëse jam në Amerikë, është sepse dua një fëmijë, dhe e dua edhe i vetëm”. Kështu shprehet këngëtari italian Tiziano Ferro për revistën “Vanity Fair”, lidhur me jetën e re të tij në Los Angeles, ku ka jetuar vitin e fundit.
Pikërisht në faqet e kësaj reviste të përjavshme deklaroi homoseksualitetin e tij në vitin 2010. Ndër të tjera në këtë intervistë ai flet mes të tjerash për situatën e tij sentimentale dhe dëshirën për t’u bërë prind.
Këngëtari deklaron se nuk ka në partner momentalisht, “Sapo deklarova prirjet e mia seksuale, u fejova dhe qëndruam bashkë për katër vjet. Ditën që përfundoi gjithçka, u ula në tavolinë dhe për gjysmë ore shkrova tekstin e këngës “Solo”, e cila është edhe një ndër këngët e mia më të preferuara. Në periudhën e parë që isha vetëm pata një ankth të tmerrshëm”.
Lidhur me amerikanët shprehet se nuk frekuenton asnjërin, duke shtuar se perfeksioni fizik i tyre e tremb.
“Kërkoj diçka më normale, si nga brenda edhe jashtë”, deklaron Ferro, shkruan noa.al.
Ai tregon se ëndërron të ketë një fëmijë, “Jam në Amerikë edhe për këtë gjë. Shkoj në takime të atyre që duan të bëhen prindër. Një fëmijë do e doja, qoftë edhe i vetëm. Shpresoj vetëm që të gjej dikë me të cilin të ndaj këtë ëndërr”.
Por nëse takon dikë që nuk dëshiron fëmijë, ai thotë se do e respektonte mendimin e tij, vetëm se për disa gjëra duhet dakordësi dhe se për një rast të tillë mbetet për t’u parë./a.k
