Deklaratat e kryeministrit Albin Kurti ndaj prokurorëve vlerësohen të papranueshme pasi mund ndikojnë në rënien e mëtejshme të besimit ndaj këtij sistemi.
Në tubimet e tij, kryeministri Kurti, që synon një tjetër mandat në krye të Qeverisë së Kosovës, paralajmëroi prokurorët që të mos dalin fare në punë më datë 10 shkurt, pasi do të shkarkohen.
Avokati Ardian Bajraktari u shpreh për A2 CNN: “Sulmet e tilla, etiketimet e tilla në adresë të institucioneve të drejtësisë në përgjithësi e të prokurorisë në veçanti, ka qenë diçka që e ka karakterizuar në vazhdimësi këtë qeveri, me theks të veçantë të kryeministrit, prandaj janë të papranueshme”.
Edhe mundësia e shkarkimit nuk është në kompetencën e kryeministrit prandaj deklaratat e Kurtit shihen si përpjekje për të përfituar vota.
Avokati Xhevdet Smakiqi theksoi: “Me Kushtetutën e Republikës së Kosovës nuk ka mundësi asnjë kryeministër me çfarëdo përqindje që ka që të mund të ndërhyjë në shkarkimin apo emërimin e gjyqtarëve apo prokuroëve, dihen kompetencat, janë të ndara si shtylla të pushtetit, por këtë e bën vetëm për të manipuluar dhe për të përfituar vota”.
Kryeministri Albin Kurti ka paralajmëruar se do të themelojnë edhe një prokurori të re të specializuar për çështjet e krimit të organizuar dhe korrupsionit, ngjashëm si SPAK-u në Shqipëri, gjë që shihet e panevojshme.
“Nëse e marrim një krahasim me SPAK-un e Shqipërisë ne vetëm e kemi Prokurorinë Speciale e cila ka ndjekur, ka hetuar, ka akuzuar dhe janë dënuar edhe ish-ministra siç është Pal Lekaj në shkallën e parë edhe pse konsideroht i pafajshëm derisa të merret vendim edhe shkalla e dytë, por është një propagandë, është një gënjeshtër”, deklaron Smakiqi.
“Nuk është askund e bazuar, as në dokumentet strategjike, përfshirë edhe strategjinë për sundimin e ligjit që e ka miratuar kjo qeveri, përveç se nuk është e bazuar në bindjen time është e panevojshme për faktin se Prokuroria Speciale ka deparatment të veçantë që merren me hetimin e veprave penale të korrupsuionit dhe keqpërdorimit të detyrës zyrtare”, shton Bajraktari.
Kurti gjithashtu ka theksuar se në rast fitoreje do të themelojë edhe një gjykatë të re, siç është ajo për çështjet familjare.
