Një ditë pasi deputeti socialist Ben Blushi bëi publik vendimin për të sfiduar kreun aktual të partisë Edi Rama në garën për selinë roz ku nuk kurseu kritikat për qeverisjen e deritanishme, ka ardhur edhe reagimi i kryeministrit. Nga Vlora ku zhvilloi një takim me strukturat lokale të partisë pas fushatës së anëtarësimeve të reja dhe zgjedhjet e strukturave lokale, Rama tha se ata që kritikojnë janë në vendin e “sehirxhiut”. Edhe pse nuk ka përmendur emrin e Blushit, deklarata e Ramës vjen një ditë pas kritikave të Blushit.
“Ka kritikë që e kanë të lehtë ta bëjnë këtë sepse qëndrojnë në pozicionin komod të sehirxhiut. Që na thonë se ku po gabojnë ata që kanë marrë në dorë fatet e vendit, ndërkohë që ne që kemi marrë fatet e vendit se kemi të lehtë, por nuk tërhiqemi asnjë milimetër nga kjo rrugë reformash, që po t’i kishte bërë Shqipëria sot do ishim një tjetër vend. “Ne nuk mund ti lejojmë vetes që në emër të të mbajturit mirë me njëri-tjetrin, frikës se po humbasim vota nga ata që zhgënjehen, apo interesave që mbajtën peng reformat ti faturojmë vendit 20 vite të tjerë pa reforma”, tha Rama.
Në fjalën e tij përpara socialistëve, rama deklaroi më tej se bashkë me reformimin e Shqipërisë do reformohet edhe kjo parti. Ai vlerësoi aleancën me LSI-në ndërsa tha se reformat ambicioze janë ndërmarrë në bashkëpunim
“Jam i bindur se PS, e cila historikisht ka fituar zgjedhjet në harkun e këtij rajoni, sot ka mundësinë e artë të tregojë se të gjitha fitoret tona të mëdha dhe të rëndësishme nuk kanë qenë maksimumi i potencialit që ka PS. Falë zgjerimit e riorganizimit, falë përfshirjes së njerëzve të rinj, në zgjedhjet e ardhme do shënojmë, jo thjesht fitoren e ardhshme, por do bëjmë që të triumfojë potenciali i saj i jashtëzakonshëm. I bindur që në Vlorë e zonat e tjera pa i numëruar të gjitha, PS ka mundur gjithmonë të bëjë më shumë. Falë mbështetjes së madhe që kjo parti ka në popull, kemi pasur mundësi që në aleancë me LSI dhe partitë e tjera ti japë vendit një qeverisje që ka ndërmarrë programin më ambicioz të reformave dhe kur po reformojmë thellësisht Shqipërinë s’kemi si të mos reformojmë vetveten”,- tha Rama.
