Kreu i Kuvendit dhe njëherësh lideri i LSI-së Ilir Meta ka theksuar se mbështet propozimin e ish-kryeministrit Sali Berisha për hetim ndërkombëtar për aferën e CEZ, por jo propozimin e liderit të PD Lulzim Basha.
Në përfundim të takimit që zhvilloi me liderin e PDIU-së Shpëtim Idrizi, kryeparlamentari Meta tha se propozimi i Berishës është për hetim ndërkombëtar për çështjen e CEZ, ndërsa nuk mbështet idenë e Bashës që sipas tij është për mos hetim të kësaj çështje.
“Problem është të mos takohemi dhe jo të takohemi. Nuk hyj në letrat e zotit Braho. Janë 2 gjëra të ndryshme që kanë kërkuar i pafajshmi Basha dhe ajo e zotit Berisha. Unë kam mbështetur zotin Berisha, ndërsa Basha ka kërkuar mos hetim ndërkombëtar. Dhe tashmë dihet publikisht se kur unë them po është po.” tha Meta
I pyetur në lidhje me letrën e bërë publike dje të deputetit të LSI Spartak Braho për një intrigë të mundshme ndaj tij, Meta tha se nuk e shqetësojnë dhe trembin aspak këto intriga moçalore.
“Me qetësi dhe dashuri, mund të ju them se nga origjina ime, nuk më shqetëson asnjë lloj intrige moçalore.” përfundoi Meta
