Ndërkohë që studentët shqiptarë pritet të protestojnë të martën, më 26 maj, në Tiranë, ish-Ministri i Drejtësisë në Maqedoninë e Veriut, Krenar Lloga, ka bërë deklarata të forta lidhur me situatën.
Ndërsa ishte i ftuar mbrëmjen e së hënës në emisionin “Opinion” në Tv Klan, Lloga tha se studentët, të cilët kërkojnë të zhvillojnë provimet universitare në gjuhën shqipe, po përballen me presione dhe ndjekje nga shërbimet sekrete për shkak të protestave të tyre.
Pjesë nga biseda në studio:
Blendi Fevziu: A ka pasur presione apo tensione me studentët, veç atyre që kemi parë?
Krenar Lloga: Një pjesë e studentëve, përfshirë edhe liderin joformal që është Mevlani, kanë treguar që janë ndjekur nga njerëz që u shërbejnë agjencive të zbulimit, ose shërbimeve sekrete të Maqedonisë së Veriut. Por edhe para se të futesha këtu në emision, lajmërohet një prej disa studentëve që merr pjesë nesër në protestë, edhe dikush i ka thirrur dhe u ka thënë që:”do të mbani përgjegjësi penale nëse si qytetarë të Maqedonisë do të protestojni nesër përpara ambasadave të Maqedonisë”.
Blendi Fevziu: Kjo është e drejtë e tyre, ata mund të protestojnë ku të duan.
Krenar Lloga: Bën pjesë në të drejtat dhe liritë themelore të njeriut. Maqedonia e Veriut është anëtare e OKB-së, ka ratifikuar të gjitha konventat dhe ka në kushtetutë të drejtën e protestës. Po bëhet një luftë hibride, sidomos nga mediumet maqedonase, që duan ta tjetërsojnë fatkeqësisht…
Kujtojmë se për të martën është paralajmëruar një protestë në mbështetje të studentëve shqiptarë në Shkup, të cilët po kërkojnë zhvillimin e provimit të jurisprudencës në gjuhën shqipe. Sipas njoftimit, protesta do të nisë nga sheshi “Skënderbej” në Tiranë dhe më pas pjesëmarrësit do të marshojnë drejt ambasadës së Maqedonisë së Veriut. Tubimi është parashikuar të mbahet në orën 17:00.
