Një deklaratë e fortë vjen nga Greqia lidhur me vrasjen e minoritarit grek në Bularat të Gjirokastrës, gjatë shkëmbimit të zjarrit me policinë.
Zv.ministri i Jashtëm grek, Jorgos Katrougalos, thotë se hetimet për vrasjen e Kostandinos Kacifas, do të jenë një test edhe për negociatat mes dy vendeve, për zgjidhjen e problemeve të mbartura ndër vite.
Duke folur për televizionin grek “Antena”, ai ka thënë se autoritetet diplomatike të dy vendeve janë në kontakt të vazhdueshëm, për të hedhur dritë mbi çështjen.
Ai kërkoi që të mbrohen të drejtat e minoritarëve grekë në Shqipëri dhe të ruhen marrëdhëniet mes dy vendeve.
Katrouglas tha se pala shqiptare nënvizon nevojën që të zbardhet plotësisht ngjarja, pasi interesohen për t’i mbajtur marrëdhëniet në nivelin e mirë ku kemi arritur.
“Na shfaqin problemin e pavarësisë së drejtësisë dhe sigurisht ne u themi që e kuptojmë se si funksionon shteti i së drejtës. Deri tani, kishim evoluar në progresin e negociatave diplomatike. Me të vërtetë hetimet për këtë rast janë një test sesi do të avancojë kjo çështje me drejtësinë shqiptare dhe me negociatat mes dy vendeve”, deklaroi zv.ministri i Jashtëm grek.
35-vjeçari Kacifas, mbeti i vrarë gjatë festës së përvitshme në përkujtim të ushtarëve grekë të rënë gjatë Luftës së Dytë Botërore në territorin e Shqipërisë.
Fillimisht Kacifas qëlloi me armë zjarri ndaj policisë, ndërsa më tej kur uniformat blu u vunë në ndjekje, ai nuk i ndali të shtënat drejt mjeteve të policisë.
Kështu pas disa orësh ndjekje, 35-vjeçari u rrethua, por edhe nga aty nuk i ndali të shtënat. Kjo bëri që gjatë shkëmbimit të zjarrit të mbetet i vrarë, duke refuzuar që të dorëzohet, sipas versionit të policisë shqiptare.
/b.d
