Shqipëria mirëpret ditën e sotme stërvitjen “Defender Europe 2023”, ku trupat dhe mjetet ushtarake amerikane, shqiptare dhe partnere zbarkojnë në Tiranë në sheshin “Nënë Tereza”.
Në një intervistë për Klan News, Kolonel Arjan Osmani shprehet se në këtë stërvitje marrin pjesë 26 shtete me mbi 25 mijë trupa ushtarake.
Kolonel Osmani thotë se kjo është një stërvitje, e cila më së shumti synon testimin e kapaciteteve mbrojtëse të Aleancës për një kërcënim të caktuar sipas skenarëve të përcaktuar operacional.
Kolonel Arjan Osmani: Stërvitja “Defender Europe ’23” është stërvitja më e madhe e vitit 2023 sa i takon angazhimit operacional të Forcave tona të Armatosura. Kjo stërvitje zhvillohet nga Komanda e Ushtrisë Amerikane për Evropën dhe sjell së bashku mbi 26 shtete dhe në total, mbi 25 mijë trupa ushtarake. Vendi ynë mirëpret për herë të dytë këtë stërvitje. Është zhvilluar në vitin 2021, ku ka pasur një angazhim shumë të madh. Edhe këtë vit, Forcat e Armatosura angazhohen me mbi 1 mijë personel ushtarak të forcave kryesisht tokësore, ajrore dhe detare. Kjo është një stërvitje, e cila më së shumti synon testimin e kapaciteteve mbrojtëse të Aleancës për një kërcënim të caktuar sipas skenarëve të përcaktuar operacional, synon të testojë elementët e ndërveprueshmërisë, operacionalitetit dhe të dislokimit të forcave dhe të mjeteve në rajone të ndryshme. Pra, duke parë për nga shpërndarja gjeografike, kjo është një stërvitje, e cila teston aftësitë dislokuese dhe ndërveprueshmërinë e Forcave Ushtarake të Aleancës.
Pyetje: Deri kur do të zgjasë ky organizim i kësaj stërvitje dhe si i shërben vendit tonë?
Kolonel Arjan Osmani: Stërvitja në vetvete është një stëvitje e madhe që ka në përbërje të saj edhe 6 stërvitje të tjera më të vogla, të cilat do të jenë më së shumti në domenin tokësor, por ka edhe stërvitje në domenin ajror dhe detar. Stërvitja ka filluar javën e parë të muajit Maj në vende të ndryshme, sot është dita e vizitorëve të shquar që përkon me fillimin zyrtar të kësaj ceremonie këtu në shesh sa i takon vendit tonë dhe përgjegjësisë.
/s.f
