Për shkak të një defekti teknik, trageti i linjës Ankona-Durrës ka ndërprerë udhëtimin, duke u kthyer në portin e nisjes.
Trageti pritej të mbërrinte rreth orës 04:00 të së dielës në Portin e Durrësit, por pak kohë pas nisjes ai ka pësuar defekt dhe ka bërë një kthim të detyruar në portin e Ankonas.
Qindra udhëtarë të moshave të ndryshme kanë qëndruar të bllokuar në traget në pritje të zgjidhjes së situatës dhe vazhdimit të lundrimit, ndërsa situata e krijuar në Ankona po ndiqet me përparësi dhe nga Kapiteneria e Porteve Shqiptare.
Kapiteni i porteve, Hysni Aruçi njofton se udhëtarët e linjës do të nisen nga Bari drejt Durrësit mbrëmjen e së dielës.
Një tjetër traget i kompanisë së lundrimeve detare është nisur nga Bari për të kryer transportin e pasagjerëve të tragetit që nuk mund të rinisë lundrimin deri në riparim të plotë të defektit.
Sipas parashikimeve, Kapiteneria bën të ditur se udhëtarët pritet të mbërrijnë mëngjesin e së hënës në portin detar të Durrësit. Gjatë kësaj vonese, mbi 24 orë, atyre do t’u ofrohet shërbim dhe asistencë falas nga kompania e lundrimit që ka në zotërim tragetin e linjës që u detyrua të ndërpresë udhëtimin.
