Bardhësia e dëborës ka pushtuar prej dy ditësh qafën e Llogorasë, të ndodhur rreth 40 km në juglindje të Vlorës, përballë detit Jon.
Sezoni i turizmit dimëror, ose turizmi i bardhë ka mbërritur edhe në këtë park kombëtar, i njohur për freskinë e tij gjatë ditëve të nxehta të verës dhe për magjinë e dëborës në dimër.
E cilësuar një perlë e turizmit shqiptar, Llogoraja ka mbledhur dy ditët e fundit të rinjtë dhe aventurierët e borës e të lartësive, shkruan ATSH.
Flokët e dëborës kanë mbuluar gjithçka, duke ofruar një peizazh magjepsës ku kombinohen mjaft bukur bregu i detit dhe malet e mbuluar nga dëbora.
Qafa e Llogorasë ka rëndësi të madhe si një destinacion turistik dhe shërben si një urë tranziti për të dy llojet e turizmit, atë bregdetar dhe atë malor.
Ajo ka potencial të madh për zhvillimin e eko-turizmit, sportet e ajrit, ekskursionet dhe udhëtimet.
Ky është një vend klimatik, sepse këtu përzihen të dyja klimat, malore dhe detare e freskët. Për tifozët sportivë ky park ofron mundësi akomodimi në hotele e luksit.
/a.rada
