Keto dite ka nje debat lidhur me futjen e trahanase si ushqim te detyrueshem per femijet ne kopshte dhe çerdhe. Me poshte do te lexoni nje poezi kushtuar trahanase nga poeti Hasan Zyko Kamberi
“Trahanaja”
Nga Hasan Zyko Kamberi
More shokë, ndë këtë alem
Drejtë vete, çupa e djem,
Se pun’ e tij s’hyn ndë kalem,
Dritë kush gjeti trahanë!
Aferim ç’bëri dëngozi,
Muar qumështë prej kosi,
Me miell e nakatosi,
Dritë kush gjeti trahanë!
Fort ka qenë i diturë
S’ka qenë ndonjë i miturë,
Dritë kush e ka gjeturë,
Dritë kush gjeti trahanë!
Tetë muaj gjithë ç’janë,
Që e ziejnë e hanë,
Fukaras’ u mban hajanë
Dritë kush gjeti trahanë!
Shpejt ndë mëngjes pa ngriturë,
Ndonse plak ndonse i miturë
E kërkojnë pa u ngriturë,
Dritë kush gjeti trahanë!
Të mjerëtë hizmeqarë,
Do të ecin duke qarë,
Cili për derr, cili për farë,
Dritë kush gjeti trahanë!
Nd’atë shtëpi që s’ka trahan
Gjithë ajo fëmijë po qan,
Po Zotynë bëftë derman,
Dritë kush gjeti trahanë!
Si trahani gjellë nuk gjen,
Kur ta hash barkun ta nxen,
Si vera t’ep qejf e të nxen,
Dritë kush gjeti trahanë!
Trahanë kur e ndërtojnë,
Me qumështë e trazojnë,
Me gjalpë e përvëlojnë,
Dritë kush gjeti trahanë!
Trahanë ta shtijesh ndë tas,
Të kesh edhe bukënë has,
Piperr’ e zi t’ia bësh takas,
Dritë kush gjeti trahanë!
Trahani, ay që merr vesh,
është për ndë rixhal peshqesh,
Kur ta ziesh ta bësh përshesh
Dritë kush gjeti trahanë!
