Gjatë një konference me sipërmarrës për çeljen e kapitullit të ri të modernizimit të infrastrukturës kombëtare, përmes Buxhetit 2018 dhe Progamit 1 Miliard për Rindërtim, Kryeministri Edi Rama i është rikthyer edhe një herë tjetër çështjes së shumëdiskutuar ditët e fundit të sahateve dhe kontrolleve për puset.
Kryeministri deklaroi se nuk do ketë pagesë për ata që s’kanë ujë në shtëpi dhe kane hapur puse, thjesht do te formalizohen.
Rama tha se është krijuar një konfuzion në lidhje me deklaratat për puset, “ç’të duhet ty për ujin që nxjerr vetë. Ç’më duhet mua për ujin që nxjerr vetë? Po shko provo të nxjerrësh ujë vetë, jo në gjermani, por në Itali dhe na lajmëro nëse do dalë më parë uji nga vrima, apo do ngrihesh ti zgupthi e të japësh llogari. Sepse është pasuri kombëtare.
Shfrytëzimi i ujërave nëntokësor është kudo i normuar, edhe në Shqipëri. Si mundet një kompani të marrë ujin me sasi të mëdha nga nëntoka dhe të mos paguajë kokërr leku. Ujin e kujt po merr, të gjyshit? Apo të stërgjyshit? Është pasuri kombëtare.”
Rama tha se me deklaratat e tij aktualisht nuk bën fjalë për puset e shtëpive.
“Ne nuk kemi folur dhe nuk kemi parasysh puset e shtëpive, nuk kemi parasysh sot as puset e hapura nga njerëzit në fshat për vaditje aty ku nuk ka sistem vaditës. Janë në të drejtën e tyre.”, deklaroi Rama
a.ç
