Nga Ben Andoni
Nëse në dy vitet e fundit nuk do mundësohej nga Televizioni Publik transmetimi i Kupës UEFA në futboll dhe Moto GrandPrix, atëherë agonia e institucionit më të madh duhej të merrte fund në formën më skajore. E megjithatë, edhe me këto dy arritje të spikatura, nuk po përmendim Festivalin Europian të Muzikës së Lehtë që gjithnjë e më shumë po e humbet vlerën, ai ka rënë ditët e fundit në kuotat më të ulëta të respektit me mostransmetimin e Kampionatit Evropian të Futbollit.
Kolegët e RTSH-së me një alibi qesharake u justifikuan për mosdhënien e EURO 2016 me servilizmin e tyre organik të 25 viteve të fundit, duke e bërë këtë institucion të medias nga më të turpëruarit përpara njerëzve.
Kjo ka qenë fyerja e radhës prej tyre e publikut shqiptar, megjithëse shenja ka pasur edhe herë tjetër kur ndeshjet, që duhej t’i jepte RTSH janë transmetuar në platformat private. Dhe, megjithëse qytetarëve shqiptarë u duhet konform ligjit të shohin Kampionatin Europian e Botëror të Futbollit, ashtu si njësoj Kombëtaren e tyre kurdo pa pagesë, janë konsideruar këtë herë krejt si të huaj në atë që duhej të ishte shtëpia e tyre informuese. Të mendosh në atë varfëri që e sundon Shqipërinë në vendet skajore, atëherë do të bindesh se padrejtësia është shumë e madhe. Dhe më e madhe bëhet nga përgjigja bajate zyrtare e kolegëve të RTSH-së.
Në fakt, nuk është më shumë kjo sesa papërgjegjshmëria në vite e këtij institucioni, që paguhet për të emëtuar përditmërinë e shqiptarëve. Dhe ky institucion, tashmë simbol i paaftësisë dhe i shumë të paaftëve që gëlojnë prej servilizmit, as edhe një herë nuk ka mundur të tregojë një figurë integriteti, ka mbetur një ekuipazh gati për çdo vendim që merr politika në këtë institucion. Kuptohet se është e justifikuar , pasi me atë integritet që ka shumica e personelit aty, asnjëherë nuk do ngrenë zërin profesionalisht pasi u nevojitet ta shtyjnë ashtu turpshëm, si po e shtyjnë. Dhe, kjo shpjegon arsyen pse nuk turpërohen profesionistët aty që TVSH megjithë infrastrukturën e vet nuk e mbulon dot Shqipërinë. Nuk u ka ardhur turp që ka vende që sinjalin e saj mund ta shohin të amplifikuar nëpërmjet platformave të tjera!
Dhe, se mos vetëm kjo: Prej vitesh nuk ka një emision prej këtij institucioni ta mbajë publikun shqiptar në pritje, nuk ka analizë të thjeshtë për situatën, apo të themi fotografim social të Shqipërisë dhe gjendjen reale ekonomike të vendit.
Në këtë televizion që mbahet me paratë e taksapaguesve megjithë gjeografinë e pretenduar që duan t’i japin drejtuesit e saj, problematika e njerëzve nuk duket asnjëherë. Është shumë më tepër emisioni i Bashkim Hoxhës në mëngjes sesa të gjitha departamentet sociale dhe ekonomike aty. Dhe, ironia shtohet kur kujton luksin e shumë njerëzve të saj dhe emisionet pafundësisht të dobëta, që prodhohen nga bjerraditësit aty.
Ndërkohë tenderat, skandalet dhe udhëtimet pafund të ekuipazheve të veta, bashkë me shpërdorimin që i bëhet infrastrukturës së institucionit, kanë qenë shpesh në qendër të kritikave, por që në fund asnjëherë nuk u është shkuar drejt e në fund një reformimi të saj. Sepse RTSH mbetet dhe me sa duket do vijojë të jetë një minierë për të fituar dhe për të dezinformuar shqiptarët, duke nxjerrë vetëm një të shtatën e potencialit të saj, që i kushtohet njëherë njërës parti dhe herën tjetrës partisë tjetër./. Javanews
