Debati për pagat e gjyqtarëve/ Holta Zaçaj: Kritikat janë kufiri, nuk pranojmë presione!

Kërkesa e unionit të gjyqtarëve dërguar në Gjykatën Kushtetuese që kërkojnë rritje page prej 700 Eurosh, ka futur në një debat qeverinë me gjyqësorin.

Pas kritikave të Kryeministrit Edi Rama që kundërshton rritjen e pagave për gjykatëst, kryetarja e Gjykatës Kushtetuese, Holta Zaçaj, thotë se kjo gjykatë pranon kritika, por jo presione.

Në një prononcim për gazetarët, Zaçaj theksoi se kritikat janë kufiri për Gjykatën Kushtetuese.

“Ne vlerësojmë që çdo vendim i yni mund të jetë objekt kritikash. Ju vetë (për gazetarët) keni pasur të tilla dhe unë e kam inkurajuar faktin që e drejta dhe liria e shprehjes nënkupton pikërisht këtë. Por kufiri mbetet deri te kritika dhe jo tek presionet”.

E pyetur nga gazetarët për faktin që dy vendime të Gjykatës Kushtetuese nuk janë zbatuar, znj.Zaçaj deklaroi se ky fakt në fund të fundit tregon nivelin e demokracisë në vend.

“Zbatimi i vendimeve të Gjykatës Kushtetuese tregon në fakt stadin e demokracisë, sigurisht kemi ende punë për të bërë.

Vendimet tona janë të zbatueshme. Ka vendime të cilat politika merr koston e vetë nëse nuk i zbaton. Kur flasim për pushtete të tjera.

E rëndësishme është që Gjykata funksionon, gjykata doli dje me një prononcim, sepse detyra është t’i garantojmë publikut që gjykata funksionon e pavarur dhe e paanshme. Mendimet që vijnë nga të gjitha anët, përfshirë edhe mendimet që jep media, ndonjëherë duke verifikuar burimet e informacionit dhe ndonjëherë duke mos i verifikuar ato, ne i çmojmë por në thelb është e rëndësishme që publiku të jetë i mirëinformuar, të marri informacionin e duhur, dhe nga ana jonë ne të sigurojmë publikun që në fakt jemi të pavarur dhe të paanshëm dhe bëjmë punën tonë, pavarësisht se kush janë interesat apo se si mendojnë palët e përfshira në proces, dhe jo vetëm.

Janë deklarata të zakonshme që ne i kemi parë nga të gjitha palët e përfshira në proces, përfshi dhe median. Sepse ndonjëherë jeni ju të medias që i jepni zë më shumë seç duhet mendimeve, opinioneve që jepen për vendimet tona.

Megjithatë, përsa kohë vjen në kuadër të lirisë së medias, kjo është një vlerë e shtuar”, u shpreh kryetarja e Kushtetueses, Holta Zaçja.

Kryeministri Edi Rama e konsideron skandaloze kërkesën për rritje të pagave të bërë në Gjykatën Kushtetuese nga Unioni i Gjyqtarëve të Shqipërisë.

Edhe kryetari i Partisë Demokratike, Sali Berisha është shprehur kundër rritjet së pagave me 700 Euro për gjyqtarët.