Nga Mero Baze
Kam qëndruar larg fushatës lincuese ndaj partive të reja në zgjedhjet e fundit dhe kur ata shpesh tregonin papjekurinë e tyre politike. Ata ishin katër opozitarë të rinj që në të vërtetë bënë maksimumin për të siguruar mbështetje dhe nuk morën pak.
Ajo teoria që Lapaj është agjent i Sorosit, Shabani agjent i Ramës, Shehaj agjent i Berishës dhe Qorri agjent i shokut Enver, është gjëja më qesharake që prodhoi retorika e një fushate të dëshpëruar elektorale, ku opozita, meqë kishte të sigurt humbjen, shpikte përgjithësisht armiq tek opozitarët e rinj.
Pastaj banaliteti i sherrit mes Lapajt dhe Shabanit është një histori e provokuar nga Lapaj, i cili u tërhoq nga premtimi i tij për pjesëmarrjen në parlament.
Dhe prej këtu nis gjithë konspiracioni i ri.
Kandidimi i Endri Shabanit për Avokat të Popullit nuk ka lidhje me Edi Ramën. I dëshpëruar nga gara elektorale, ai hoqi dorë nga politika dhe provoi të hynte në një garë institucionale. Nëse do të shikojmë CV-të e gjithë kandidatëve për të cilët qan opozita, Endri Shabani është me një distancë të fortë. Është PhD në Oksford. Ne nuk kemi në qeveri askënd me PhD, askënd në parlament dhe kam frikë se askënd edhe në administratën e lartë shtetërore. Është bursist i qeverisë angleze, pra i përzgjedhur në një farë mënyre dhe me një kornizë mbështetjeje zyrtare prej tyre, pas një periudhe të gjatë aktivizmi në Shqipëri. Dhe janë shumë të lumtur që është zgjedhur Avokat i Popllit pa votat e Sali Berishës dhe Flamur Nokës që i kanë “non grata” në Britani.
Qeveria deklaroi se nuk do kishte kandidatë të saj, por kjo nuk do të thotë se hoqi dorë nga votimi në Kuvend. Hoqi dorë nga kandidatët e saj në këtë garë.
Tani, mes dikujt që ka arritur të mbrojë PhD në një nga pesë universitetet më të mira të botës dhe një tufe kandidatësh të tjerë, të cilëve duhet t’u verifikosh çdo dëftesë e diplomë nëse e kanë marrë në rregull, Endri Shabani është shumë përpara. Kur gara mbaroi dhe kandidatët u regjistruan, qeveria ishte e lirë të zgjidhte dhe padiskutim ka zgjedhur personin me CV-në më të mirë.
Ky debat opozitar për firmat është tejet banal. Unë nuk mendoj se ka ndonjë tradhti në këtë histori, pasi opozita ka dhënë firma për të gjithë kandidatët. E njëjta gjë do të thuhej nëse shumica votonte Kalanë, Ndregjonin, Tartarin apo dikë tjetër. Nëse nuk do t’i pëlqente Berishës votimi i PS, do ta quante agjent të Ramës. Dhe është e sigurt që PS do votonte dikë që nuk i pëlqente Berishës.
Por ky debat nuk tregon kush është Endri Shabani, por kush është opozita dhe çfarë do të thotë ta lësh shtetin në dorë të saj. Me këtë logjikë që zhvillohet debati, nëse je në dorë të Berishës, mes dikujt që ka përfunduar në Oksford dhe dikujt që është me shkollë nate, ky i fundit zgjidhet, se duhet t’ia dijë për nder Berishës. Dhe këtë gjë e ka bërë historikisht këto 35 vjet, sa herë zgjidhen njerëz në krye të institucioneve të pavarura nga opozita, por jashtë dëshirës së Berishës. E ka bërë me kontrollin e shtetit më 1997 dhe 2002, kur u zgjodh Robert Çeku; e ka bërë me anëtarë të Gjykatës së Lartë apo Kushtetuese; dhe po e bën përsëri me Avokatin e Popullit.
Dhe gjithë kjo lukuni që mallkon një djalë të ri që ka mbaruar në Oksford pse pranoi votat e socialistëve me firmat e Berishës, tregon se ç’njerëz të marrë shkojnë pas Berishës. Çdo kush që do fitonte i kishte firmat e Berishës dhe do të merrte edhe votat e Ramës. Ku është ndryshimi mes tyre dhe Shabanit, përveç përgatitjes akademike dhe faktit që Berisha bën sikur ia ka bërë Rama me hile, që të mos përballet me Adriana Kalan, nga e cila ndjehet sikur është lehtësuar që i ka ikur nga selia?
Çdo deklaratë rreth firmave është kundër PD-së. Kur thonë “na urdhëroi Flamuri”, bëhen qesharakë; kur thonë “na urdhëroi Salianji”, bëhen paranojakë; kur thonë “na urdhëroi Saliu për Florin”, bëhen renegatë. Të gjitha këto tregojnë se Shabani nuk është se nuk e meriton të jetë Avokat i Popullit, por sipas tyre, u bë në një moment të keq. Po të ishte bërë kur qe dakord Berisha, Flamuri apo Salianji, do ishte mirë.
Kjo tregon çfarë do të thotë ta lësh Shqipërinë në dorë të këtyre, që në fakt akoma nuk thonë kë do zgjidhnin në vend të Shabanit, se dalin zbuluar. Ndërkohë që mund ta uronin Shabanin dhe të dukeshin sikur e morën një fitore, pasi këdo që të zgjidhnin do t’i turpëronte gjatë mandatit shumë më tepër se sa janë “turpëruar” për firmat e Shabanit. Avokatii Popullit zgjidhet me votat e Edi Ramës jo me firmat e Flamurit, dhe Edi Rama ka marrë 83 mandate plus 3 të tjera në aleancë, më 11 Maj 2025. Fal Sali Berishës përballë!
