Kryeministri Edi Rama gjatë një takimi me fermerët e Elbasanit ka folur edhe për akuzat e deputetit të PD-së, Agron Shehaj se i kanë dërguar policinë në dyert e bizneseve të tij. Kreu i qeverisë tha se policia ka shkuar në mbështetje të IKMT-së në biznesin në fjalë dhe gjithçka ka qenë pjesë e operacionit të konfiskimit të metrave katrorë pa leje.
Sipas Ramës, deputetët e opozitës ushqehen nga oligarkët, pavarësisht se akuzojnë mazhorancën për këtë gjë. Po ashtu, ai u shpreh se Shehaj bën viktimën e fjalës së lirë ndërkohë që qeveria po tenton t’i japë një goditje biznesmenëve që ndërtojnë pa leje me qëllim përfitimin. Ai tha se arsyeja pse PD e ka ankimuar vendimin e qeverisë në Kushtetuese është për shkak sepse “ata janë bashkë”.
“Dalin e vrau, e vrau, e vrau, Policia del pasdite një deputet atje dhe tregon se si regjimi po i prish biznesin. Nuk e di a e patë… Më kanë ardhur”. E vërteta është komplet tjetër. Kanë edhe një pafytyrësi monumentale. Policia nuk ka vajtur tek biznesi i deputetit. Policia ka vajtur në mbështetje të Inspektoratit Kombëtar të Mbrojtjes së Territorit në vazhdën e operacionit për të bllokuar dhe për të sekuestruar dhe konfiskuar të gjitha metrat katrorë të ndërtuara pa leje për qëllim fitimi nga ata “oligarkët” që na i faturojnë ne, por që në fakt janë këta që janë mësuar të ushqehen prej tyre, ka bllokuar godinën për të cilën pronari a investitori thoshte vazhdimisht e kam hotel dhe brenda na gjendet një biznes i një deputeti, një ballist foltoreje.
Se e them këtë të ballistit se është për të qeshur se këta që në kohën e Shefqet Musarajit dhe atyre epopeve dalin të fshehur nëpër kotece. Doli brenda me biznes në një ndërtim pa leje, të jashtëligjshëm. Dakord ka hyrë atje. Këta nuk e kanë problem të shkelin rregulla, ligje, sidomos me ndërtimet kanë një raport shumë patologjik se i duan pa leje, por si ka mundësi del në parlament atje kap foltoren dhe fillon policia, regjimi, Edi Rama. Ku di unë merr emra nëpër gojë, duan t’i mbylli gojën… Ça ti mbylli gojën atij ne? Ai sa herë flet, ne na jep pikë. Si t’ia mbyllim gojën? T’i mbyllës gojën dikujt që të jep pikë kur flet. Bën dhe viktimën e fjalës së lirë. Dhe pavarësisht nga fakti që ne po i japim një goditje përfundimtare atyre që janë mësuar të hapen jashtë lejeve për qëllime fitimi, pra më të pasurve, janë po këta që çojnë në gjykatë kushtetuese ankesë.
Po ç’punë ka një parti politike të ankohet pse shteti kap disa biznesmenë në shkelje të ligjit? Pse duhet të shkojë një parti politike në gjykatë? Shumë e thjeshtë sepse janë bashkë. Ndryshe nga çfarë thonë. Flisnin për Kosovën e më bëjnë mua bashkëpunëtor të serbit, por kur vjen puna për ta mbrojtur Kosovën aty ku duhet mbrojtur bëhen me rusin”, u shpreh Rama.
Gjatë seancës plenare ditën e enjte, pati debate edhe për bizneset e deputetit demokrat Agron Shehaj. Deputeti demokrat akuzoi kryeministrin se në hakmarrje politike ka dërguar policinë në dyert e bizneseve të tij.
/s.f
