Tema e emisionit “Debat” në A2 CNN këtë të martë ishte vetingu në politikë, por të ftuarit juristë dhe avokatë e përqendruan debatin e tyre, me tone shpesh edhe të ngritura, te vetingu në sistemin e drejtësisë.
Për ish-anëtarin e Gjykatës Kushtetuese, Besnik Muçi, vetingu në sistemin e drejtësisë është i përshtatur vetëm për vendin tonë. Ai theksoi se këtë proces nuk do ta pranonin edhe vendet e botës së tretë.
Por kjo u kundërshtua nga juristja Enida Bozheku.
“Nuk është kështu. Nuk është vetëm Shqipëria subjekt i reformës në drejtësi. Rumania, Bullgaria, Hungaria, kanë kaluar reformën në drejtësi. Reforma në drejtësi është e shpikur për vende të korruptuara të lindjes”, tha ajo.
“95% e gjyqtarëve dhe prokurorëve të shkarkuar janë shkarkuar për nenin 63, pamjaftueshmëri të deklarimit, për gabime 500 apo 1 milion lekë dhe jo për korrupsion, të inkriminuar. Reforma në drejtësi u duhej për të mos pasur sistem drejtësie Shqipëria. Nuk funksionon asgjë”, tha ish-anëtari i Kushtetueses.
Juristja shkoi edhe më tej, duke theksuar se juristët dhe prokurorët që ngelën në veting nuk duhet të punojnë si avokatë. A2
