Opozita është gjendur e papërgatitur sot në Komisionin e Medias, i mbledhur për të diskutuar mbi shqetësimin e ngritur se gërmimet që po kryhen për projektin “Veliera” po dëmtojnë pasuritë arkeologjike të qytetit të Durrësit.
Ndërkohë që anëtarët e PD janë përpjekur për të gjetur ndonjë mangësi në procedurën e ndjekur nga instituciuonet përkatëse, ministrja Kumbaro iu është përgjigjur se deri në vitin 2013, 60% e vendimeve të Këshillit Kombëtar të Arkeologjisë ishin vendimet qarkulluese, të marra në zyrën e ministrit përkatës pa u shqyrtuar fare projekti.
“Deri në vitin 2013 rreth 60% e vendimeve të Këshillit Kombëtar të Arkeologjisë ishin vendime qarkulluese, ku KKA as që mblidhej për të shqyrtuar projektet, ndërsa nga janari i vitit 2014 ka zero vendime qarkulluese. Mbledhjet e KKA dhe KKR janë mbledhje maratone ku diskutohet me orë të tëra për çdo ndërhyrje në territor, qoftë nga subjekte private apo nga shteti për çdo lloj punimi që mund të kryhet”, tha Kumbaro.
Përfaqësuesit e opozitës, janë fokusuar deri në çështje si varfëria, ndërsa nuk paraqitën asnjë provë se po shkelet ligji apo se puna e kryer nga arkeologët lë vend për abuzime. Deputeti i PD-së Myqerem Tafaj, në komisionin e thirrur për gërmimet në Durrës madje ngriti pyetjen nëse qytetarëve të Durrësit iu shërbente më shumë projekti i Velierës, apo me lekët për ndërtimin e saj do të ishte më mirë nëse do të ndihmoheshin qytetarët e varfër të Durrësit.
Përgjigjen për këtë, Tafajt ia dha Kryetari i Bashkisë së Durrësit, Vangjush Dako, i cili iu përgjigj se kanë qenë vet qytetarët e Durrësit ata që kanë votuar pro projektit qëkur ai është prezantuar.
Seanca dëgjimore me ministren Kumbaro, kryetarin e Bashkisë Durrës, Drejtoreshën e ASHA dhe përfaqësuesin e IA, u thirr nga komisioni për informimin publik pas pretendimeve të ngritura nga shoqëria civile për prishjen e objekteve arkeologjike në zonat A dhe B ,nga punimet që po kryhen për projektin e Velierës. /b.d
