Partia Demokratike, Lëvizja Socialiste për Integrim dhe partitë e tjera opozitare janë shprehur unanimisht pro vendimit që mori Lulzim Basha për djegin e mandatave të deputetëve si rrugë e vetme. Pas zyrtarizimit të vendimit të Bashës në mbledhjen e grupit, kryetar i PD-së, mblodhi aleatët opozitarë të cilët e mbështetën nismën. Ndërsa e fundit që foli nga aleatët ishte LSI-ja. Pas mbledhjes së grupit pasditen e sotme në orën 17:00, kryetarja Monika Kryemadhi doli në një deklaratë për mediat ku u shpreh se i bashkohet qëndrimit të Partisë Demokratike se rruga e vetme është djegia e mandatave të deputetëve referuar situatës politike ku ndodhet vendi. Kryetarja e LSI-së gjykon se kjo është e vetmja rrugë për të rrëzuar kryeministrin Edi Rama.
“Grupi i LSI, vlerëson se djegia e mandateve është rruga e vetme për të kthyer legjitimitetin e qeverisjes së Shqipërisë , prandaj ai vendosi sot djegien e mandateve”, tha mes të tjerash Kryemadhi.
“Shfaqim shqetësim për shkatërrimin e elementit themelor të demokracisë, ndarjen e pushteteve.
Në mediat ndërkombëtare u paraqit gjendja e vështirë në vend, vjedhja e votës dhe problemet në vend.
Vjedhja e votës është burimi themelor i konfliktit, keqqeverisja dhe pandëshkueshmëria.
Mazhoranca nuk ka realizuar reformat e nevojshme për hapjen e negaociatave për në BE.
Sjellja e mazhorancës është e qëllimshme për të mos garantuar zgjedhje të lira e të ndershme.
Me shqetësim përcjellim gjendjen e vështirë ekonomike, rritjen e taksave, korrupsionin galopant, ikjen e të rinjve.
Mazhoranca refuzon dialog politik dhe ka shfaqur bullizëm.
Ajo po refuzon një qeveri tranzitore që do garantojë zgjedhje të lira e të ndershme dhe reforma zgjedhore që do sjellin hapjen e negociatave për në BE.
Djegia e mandatave është rruga e vetme për të rikthtyer shtetin e së drejtës dhe rikthimin e legjimitetit.
LSI vendos djegien e mandateve dhe mandaton kryetarin e kësaj lëvizjeje që të ndjekë procedurat statutore”, tha Monika Kryemadhi.
Sipas burimeve mbledhja e grupit të LSI-së është shoqëruar me debate, por në fund u vendos djegia e mandateve.
/a.meta
