Mbledhja me dyer të mbyllura e grupit parlamentar të PD-së nuk ka qenë e qetë as kësaj here, teksa dy deputetet demokrate Majlinda Bregu dhe Jozefina Topalli kanë kritikuar ashpër kryedemokratin në lidhje me protestat që organizon opozita. Sipas Bregut dhe Topallit, të cilat e kanë shprehur hapur kundërshtinë e tyre për protestën e fundit të organizuar nga PD, opozita në të kundërt do duhet të ngrihet në protesta për kauzën e qytetarëve. Burime për Javanews pranë PD-së thonë se Topalli, duke ju drejtuar Bashës i ka thënë se PD nuk mund të sillet si një OJQ. Ish kryetarja e kuvendit ka kërkuar nga kryedemokrati që të bëhen protesta me kauzat e qytetarëve.
Sakaq mësohet se Bregu i ka thënë Bashës se “nuk jemi tek Balla apo Fevziu që t’më japësh përgjigje televizive”.
Nga ana tjetër debat ka prodhuar edhe pozicioni aktual dhe ai që do duhet të mbahet në lidhje me raportin e opozitës me parlamentin dhe komisionet parlamentare. Basha ka pyetur deputetët nëse janë për bojkot total të kuvendit apo për bllokimin e seancave parlamentare.
Një përgjigje ka ardhur nga deputeti Genc Ruli, i cili ka kërkuar qartësimin e pozicionit të opozitës në lidhje me këtë pikë, duke lënë të kuptohet se një bojkot i plotë do të ishte në dëm të opozitës.
Ish lideri historik i PD-së Sali Berisha ka kërkuar nga deputetët dhe vetë Basha që fokusi i oponencës së opozitës të jetë për reformën në drejtësi dhe Byronë Kombëtare të Hetimit, pasi në këtë javë politike, Basha e ka fokusuar luftën tek dekriminalizimi.
