Debate të forta janë bërë sot në Komisionin e Sigurisë nga deputetë të Partisë Socialiste dhe Lëvizjes Socialiste për Integrim ku deputeti Luan Rama ka thënë se po të ndodhte grabitja e Rinasit në kohën kur ai ishte Ministër i Brendshëm, ai do të shkarkohej.
Kjo deklaratë ka ardhur gjatë debatit me deputetin socialist Pjerin Ndreu i cili i ka thënë Flamur Nokës se Luan Rama po e përfaqësonte denjësisht.
“Flamur, Luan Rama të ka përfaqësuar denjësisht” ka thënë Ndreu.
“Pjerin po të kishte ndodhur në kohën kur ishe polic i Tiranës do ishe shkaktuar, po ashtu edhe unë si Ministër”. tha Luan Rama.
Për debatin Ndreu-Luan Rama, Pirro Lutaj ka thënë se ai ishte jo informal, ndërkohë që sa i takon grabitjes, ai ka thënë se, ajo ishte një ngjarje e rëndë që duhet të zbardhet.
“Nuk bëj analiza debatesh, komisioni duhet të merret me objektin e saj, ky është debat i bërë jashtë formalizmave, është debat informal. Unë kam parë elementë të kontratës së koncencinarit, që i jep të drejtë absolute për të kontrolluar elementët e sigurisë. Kjo nuk shmang angazhimin e strukturave tona. Opozita do që ta politizojë këtë gjë, duke e lidhur me faktin se strukturat nuk kanë marrë masat e duhura. Grabitja është e rëndë, duhet të nxirren përgjegjësitë, duhen parë kompetencat” tha ai.
Luan Rama ka shtuar se, Komisioni i Sigurisë duhet që të kërkojë informacion nga institucionet përkatëse, pasi grabitja ka ndodhur vetëm një ditë pasi Policia e Shtetit deklaroi se ka marrë masa shtesë sigurie, pas ngjarjeve në Stamboll.
“Duhet të kërkojmë informacion nga ata që kanë përgjegjësi. Presidenti dhe qeveria nuk kanë reaguar për grabitjen. Komisioni të kërkojë informacion nga ata që kanë përgjegjësi në Rinas. Si ka qenë reagimi i institucioneve të sigurisë për masat shtesë? Ministria e Brendshme ka folur për masa shtesë dhe ditën pasi foli për masa shtesë ndodhi edhe grabitja. Ai grup që grabiti paratë me armë, mund të rrëmbente armët” ka thënë ai.
Rama ka shtuar se, duhet hetim parlamentar ndaj institucioneve të sigurisë.
“Duhet të kërkojmë llogari, kontroll parlamentar që kanë impakt në institucione si areoporti i Rinasit. Faktet janë të rënda dhe akuza është e rëndë. Referuar njoftimit të policisë së shtetit duhet kontroll parlamentar ndaj instituciove të sigurisë aq më tepër kur një ditë para u paraljamërun masa shtesë të sigurisë. Është e rëndësishme që si mund të hyjë një grup i armatosur në Rinas. Duhet të kërkojmë informacion kush kanë qenë masat e sigurisë” tha ai.” ka thënë ai.
Me të njëjtat tone ka folur edhe deputeti demokrat, Asllan Dogjani i cili ka thënë se, Ministri duhet të raportojë, pasi një ditë nuk është çudi që në kryeministri të futen grabitës me maska.
“Nesër do të hyjnë në Kryeministri me maska. Rinasi jo rasti i vetëm, i treti që grabiten paratë duke shkuar në Rinas. Edhe kryetari i Komisionit Sigurisë do mbajë përgjegjësi morale se do rritet numri i vrasjeve. Djemtë e politikanëve janë të përfshirë me krimin.” tha Dogjani.
Ndërkohë, anëtarët e shumicës në komision, kanë deklaruar se çështja tashmë është nën hetim dhe nuk mund të ndërhyhet.
Pirro Lutaj ka thënë se, “Organet e shtetit të angazhuara në zbardhjen e ngjarjes”.
Pjerin Ndreu ka thënë se, nëse opozita ka ndonjë informacion rreth grabitjes të ndihmojë organet kompetente.
“A dini ju ndonjë lidhje kush ka qenë në grabitje? Nëse keni shkoni denonconi, mos akuzoni policinë. Duke akuzuar policinë indirekt po ndihmoni grabitësit. Po shoh që shume individë dinë shumë ne këtë komision. Shkoni denonconi” ka shtua ai.
Ndërkohë, i menjëhershëm ka qenë edhe reagimi i Luan Ramës i cili ka thënë se, rreth ngjarjes po bëhen protagonizma, duke thënë se asi nuk ka akuzuar asnjë person.
“Shoh se, po bëjmë protagonizmin duke thënë se çfarë ka bërë një ish ministër apo ish polic. Nuk ndava as Ministrinë e Transporteve e as atë të Brendshme. Nuk akuzova asnjë” tha Rama.
Xhemal Qefalia ka shtuar se, nëse dikush ka informacione duhet që të bashkëpunojë me policinë.
“Keni shumë informacione, denonconi se keni dhe shpërblim 30 mijë euro. Tahiri nuk ia ka marrë me dhunë postin Nokës”.
shqiptarja.com/d.i.
