Partia Demokratike ka ndryshuar strategji sa i takon reformës zgjedhore. Edhe pse gjatë zgjedhjeve të kaluara kjo forcë politike këmbënguli te futja e teknologjisë në procesin zgjedhor, dje demokratët kanë vendosur që ta lënë mënjanë këtë të fundit dhe të përqendrohen te procesi i dekriminalizimit.
Gjatë ditës së djeshme, PD zhvilloi një mbledhje me grupin parlamentar, ku tema kryesore për të cilën u diskutua ishte reforma zgjedhore. Në këtë mbledhje, deputeti demokrat, njëherësh edhe bashkëkryetari i Komisionit për reformën zgjedhore, Oerd Bylykbashi paraqiti draft-strategjinë e Partisë Demokratike, e cila përmblidhet në një aksion politik, dekriminalizimi i zgjedhjeve.
Sipas demokratëve, kjo e fundit është një nga shtyllat kryesore të reformës zgjedhore, ndërsa u shprehën se edhe votës së emigrantëve duhet që t’i kushtohet rëndësia e duhur. Ndërkohë, mbledhja e ditës së djeshme në selinë blu është shoqëruar me debate dhe diskutime të shumta mes të pranishmëve sepse fokusimi së fundmi i PD te dekriminalizimi i zgjedhjeve ka sjellë paqartësi për ta.
As vetë deputetët demokratë nuk e kuptojnë se çfarë partia e tyre po kërkon, ndërsa flitet që shumë shpejt Partia Demokratike do të dalë me një propozim mjaft kompleks, ku do të kuptohet edhe dekriminalizimi i zgjedhjeve dhe ajo se çfarë ata synojnë të arrijnë. Sipas kryetarit të PD, Lulzim Basha paqartësia vjen sepse procesi është ende në nisje.
Në një deklaratë për mediat pas përfundimit të mbledhjes, ai u shpreh se kanë disa propozime të cilat do të pasurohen përmes konsultimit brenda demokratëve, me aleatët politikë dhe me të gjithë faktorët shoqërorë që duan ti japin fund shitblerjes së votës, dhunimit të votës dhe bashkëpunimit midis kriminelëve dhe politikanëve. Duhet thënë se deri ditën e djeshme, e djathta vinte gjithmonë theksin te futja e elektronikës në zgjedhje, ndërsa tani ndryshoi mendim dhe objektiv në mënyrë të papritur.
ma.me
