Gjermania nuk duhet të lëkundet në qëndrimin e saj nga kërcënimet e presidentit turk, Recep Tayyip Erdogan për prishjen e një marrëveshjeje lidhur me kufizimin e numrit të azilkërkuesve që duan të vijnë në Evropë, deklaroi ministri i Brendshëm gjerman, Thomas de Maiziere.
Para pak kohësh, Bashkimi Evropian arriti një marrëveshje me Ankaranë për reduktimin e fluksit të migrantëve që udhëtojnë nëpërmjet Turqisë në union, në shkëmbim të heqjes së vizave për qytetarët turq për të hyrë në Evropë.
Por, përpara kësaj, unioni kërkon që Turqia të përcaktojë më qartë termin terrorizëm, pasi Bashkimi Evropian është i mendimit se në kuadër të luftës kundër terrorizmit, Ankaraja ka mbajtur një qëndrim shumë të ashpër ndaj medias dhe opozitës.
Erdogan e ka kundërshtuar kërkesën e unionit dhe ka deklaruar se parlamenti do ta refuzonte marrëveshjen në rast të mos heqjes së vizave.
“Nëse kushtet për heqjen e vizave nuk plotësohen, atëhere nuk do të ketë heqje vizash. Në politikë askush nuk duhet të lëkundet nga kërcënimet publike”, deklaroi De Maiziere.
“Ne nuk duhet ta lejojmë veten të shantazhohemi. Erdogani mund të kapardiset sa të dojë”, thekson ministri për gazetën ”Neue Osnabrucker”. (javanews.al / r.a)
