Gianni de Biasi është në qendër të vëmendjes. Ai po kritikohet nga analistët, trajnerët dhe ish trajnerët në Shqipëri pasi në katër ndeshjet e fundit ka pësuar katër humbje. Strategu italian thotë se është mësuar të kritikohet kur ishte në Serie A. Madje, ai ka thënë se i pëlqejnë situatat kur kritikohet nga të tjerët.
“Situata të tilla më bëjnë më të determinuar, më pëlqejnë më shumë momente të tilla. I kam kaluar këto momente kur kam qenë në Serinë A, me skuadra që ishin duke rënë nga kategoria dhe kemi shpëtuar. Dua t’ju them që kur shkuam në Europian ishin të gjithë të kënaqur, të gjithë protagonistë”, ka deklaruar De Biasi pas humbjes nga Bosnja.
Kur vjen momenti për të humbur më duhet mua, i duhet trajnerit të japë shpjegime në situata të tilla, por unë jam mësuar me këtë histori, me këtë pozicion. Di të them që kam një grup të shkëlqyer, të bashkuar, perfekt, të jashtëzakonshëm për të punuar bashkë, gjithmonë japin shpirtin dhe 110% në fushë”, shtoi ai.
“Por, ndodh që edhe kur japin 110% nuk mjafton dhe ndodh që të bëjmë 4 humbje rresht. Ata, të cilët deri dje kanë marrë grada, presin që të godasin trajnerin në çdo moment dhe i kanë gati fishekët për t’ia drejtuar atij. Një situatë e tillë mua më pëlqen, jam mësuar me të dhe jam shumë i qartë në çështje të tilla”, ka përfunduar italiani.
