Kryeministri turk, Ahmet Davutoglu i kërkoi sot Rusisë të rivendosë dialogun me qeverinë e tij në vend që të vazhdojë të bëjë akuza të pabaza për blerjen nga Ankaraja të naftës së prodhuar nga xhihadistët.
“Ne duhet të ulemi në një tryezë dhe të diskutojmë se çfarë ne mund të bëjmë në vend që hedhim akuza të pabaza”, theksoi Davutoglu për shtypin para një vizite në Qipron e Veriut.
Marrëdhëniet mes Turqisë dhe Rusisë janë përkeqësuar ndjeshëm që kur një avion ushtarak rus u rrëzua nga aviacioni turk një javë më parë në kufirin sirian.
Turqit akuzuan Rusinë se avioni luftarak rus kishte shkelur hapësirën e tyre ajrore, gjë që rusët e hedhin poshtë në mënyrë kategorike.
Presidenti rus, Vladimir Putin akuzoi Ankaranë për mbulimim të trafikut të naftës që siguron nga grupi i Shteti Islamik në Siri dhe në Irak, gjë që e hedh poshtë homologu turk, Recep Tayyip Erdogan.
“Kur keni një luftë në portat tuaja dhe refugjatët që hyjnë në Turqi, nuk është e drejtë të injorojmë mësymjet në qiellin tonë”, theksoi sot Davutoglu.
“Nuk është e mundur të fshehim shkeljet e hapësirës ajrore pas akuzave të pabaza ndaj Turqisë përsa i përket çështjes për blerjet e pretenduara të naftës nga Shteti Islamik”, shtoi ai.
Tensioni mes dy kryeqyteteve është i tillë që Putin ka refuzuar dje përballjen e propozuar nfa Erdogan në kuadër të konferencës së OKB-së për klimën që po mbahet në Paris, ku ishin të pranishëm të dy.
ATSH
