Dave Briggs përzgjedh Shqipërinë për të vizituar gjatë vitit 2016. Në një artikull të tij në blogun ‘Dave Travel Page, Briggs, i cili ka marrë çmime për blogun e tij të udhëtimeve, ka renditur vendin tonë në destinacionet e zgjedhura për 2016.
“Në planet e mia të udhëtimit për vitin 2016 përfshihen një numër vendesh që unë nuk i kam parë. Shqipëria, Islanda, Maqedonia, dhe Kosova janë vendet e reja që do të vizitoj dhe mezi po pres të mësoj më shumë rreth tyre. Gjithashtu do të vizitoj edhe ishujt grek , dhe ndoshta do të kaloj një kohë më të gjatë në Azi, në fund të vitit”, shkruan Briggs.
Vizitën e tij 2-3 javore në vendet e Ballkanit që ai e planifikon në periudhën janar-shkurt, Briggs e vlerëson si interesante. “Kjo do të jetë interesante për një numër arsyesh. Së pari, unë kurrë nuk i kam vizituar këto vende të Ballkanit, kështu që unë mezi po pres për të parë se çfarë do të ofrojnë ato. Së dyti, disa nga këto vende kanë një prezantim të keq. Shqipëria dhe Kosova? Kush shkon atje? Por, do të ketë një seri shkrimesh në blogun tim në lidhje me atë që unë mendoj për këto vende, pas vizitës sime atje”, shkruan Briggs.
Dave travel Page është një blog që shërben për të frymëzuar njerëzit për të ndërmarrë aventura në udhëtime. Përmes tij, Dave, inkurajon njerëzit për të parë botën, për të mësuar, zbuluar, dhe të eksplorojnë. Sipas tij, kushdo mund ta bëjë këtë.
