Ish-konkurrentja e “Big Brother VIP 4”, Amber Candy, ishte e ftuar në emisionin “Live From Tirana”, të drejtuar nga Stenaldo Mëhilli, ku foli për aspekte të jetës së saj private.
Gjatë bisedës, ajo ndau gjithashtu mendimet e saj për periudhën që pasoi daljen nga shtëpia e “Big Brother VIP” dhe për synimet që ka në karrierë.
E pyetur nëse i konsideron djemtë shqiptarë paragjykues apo të hapur ndaj të resë, Amber tha se do t’i cilësonte si “kompleksik”.
“Kompleksi është një problem shumë i madh, që fatkeqësisht e kanë shumica e shqiptarëve. Duhet ta largojnë dhe të jetojnë sipas mënyrës së tyre, me më shumë liri. Nuk ka asgjë më të mirë se një jetë e lirë. Në të kundërt, kthehen në bezdi për shoqërinë shqiptare dhe kjo është e gabuar. Secili duhet të bëjë atë që dëshiron, gjithmonë duke respektuar kufijtë. Të jesh i lirë është shumë e rëndësishme”, u shpreh Amber.
Kur iu kërkua të tregonte se cili është elementi që i sjell ngrohtësi në zemër, ish-banorja e edicionit të katërt të BBV-së zgjodhi dashurinë.
“Çfarë mund të jetë më e bukur se dashuria? Kur zgjohesh në mëngjes dhe sheh krevatin bosh, ndihesh i demoralizuar. Njeriu ka nevojë për një krah të djathtë ku të mbështetet. Vetëm dashuria ta ngroh shpirtin, por duhet të jetë ajo e duhura. Kur nuk është e tillë, nuk të shijon as kafja. Nga kontakti i përditshëm me njerëzit, shoh se shumica e vajzave janë pa dashuri. Po ju, çuna? Duajini vajzat, sepse nuk ka gjë më të bukur. Mendoj se sot vajzat janë më të lira se djemtë dhe japin më shumë”, deklaroi ajo.
