Prej mëngjesit të së shtunës kur u njoftua ndarja nga jeta e kryepeshkopit të Shqipërisë, Anastas Janullatos, shtypi grek publikon pa mbarim artikuj mbi jetën dhe veprën e tij, duke e karakterizuar midis të tjerash si “Paqebërësi që blindoi Ortodoksinë në Shqipëri”.
Në një prej artikujve të gazetës të së dielës To Vima, publikohen madje edhe shumë prej thënieve të tij që mbetën në histori, ndërsa përdoren nga hierarkë, politikanë apo personalitete në biseda të ndryshme dhe fjalime.
Midis tyre veçohen thëniet:
“Dashuria është antidoti kundër egocentrizmit, kombëtar, racor, fetar, që helmon bashkëjetesën paqësore të njerëzve dhe popujve”.
“Çdo krim në emër të fesë është krim kundër vetë fesë. Çdo formë dhune në emër të fesë është, në të gjitha kuptimet, dhunim kundër vetë fesë. Asnjë luftë nuk është e shenjtë. Vetëm paqja është e shenjtë”.
“Askush nuk ka të drejtë të përdorë vajin e fesë për të ndezur zjarrin e konflikteve. Feja është një dhuratë hyjnore, e dhënë për të qetësuar zemrat, për të shëruar plagët dhe për të sjellë pranë njëri tjetrit individë dhe popuj”.
Gazeta pa dyshim nuk le papërmendur një prej thënieve të para kur kryepeshkopi Anastas erdhi në Shqipëri.
“Ne mbledhim gurët që na hedhin ata që luftojnë veprën tonë dhe ndërtojmë kisha dhe shkolla me ato gurë”.
“Shërbesa pas Liturgjisë” është slogani i tij më karakteristik, i përhapur gjerësisht në literaturën misionare ndërkombëtare, në lëvizjen ekumenike, në gojën e predikuesve dhe misionarëve vendas dhe jo vetëm, ku ai thekson: “Të shndërrohet gjithë jeta në një liturgji”.
Që të bëhet zyra jonë, altari ynë, fabrika ose shtëpia jonë, tempulli ynë, puna jonë të bëhet liturgjia jonë, ku shpirti dhe trupi ynë do të ofrohen në “një flijim të gjallë, të shenjtë, të pëlqyeshëm për Zotin”.
Mesditën e së hënës në një bisedë të shkurtër para kamerave kryeministri Mitsotakis në një takim me Kryepeshkopin e Greqisë iu referuan humbjes së Kryepeshkopit të Shqipërisë.
“Ai ishte vërtet një hierark i madh dhe një njeri i madh, që kreu një vepër unike në Shqipëri, duke rindërtuar në thelb një kishë të shkatërruar, por në radhë të parë ishte një njeri i Zotit që kujdesej për njerëzit”, tha Mitsotakis.
Kryeministri grek bëri me dije se në varrimin e tij në Tiranë do ta shoqërojë edhe vete kryepeshkopi Jeronimos.
