Pavarësisht reformave të ndërmarra, Shqipëria ende cilësohet nga Shtetet e Bashkuara të Amerikës si një vend i rrezikshëm për të huajt dhe veçanërisht shqiptarët. Kjo është bërë e ditur nga raporti i hartuar nga Byroja e Sigurisë Diplomatike (OSAC) ku theksohet se shkak për këtë është operimi i bandave kriminale dhe pafuqisë së policisë për të luftuar krimin.
Raporti i publikuar pak ditë më parë flet për sigurinë dhe aktualitetin në Shqipëri duke analizuar vitin 2014, ndërsa u bëhet thirrje shtetasve amerikanë që të bëjnë kujdes gjatë udhëtimeve në vendin tonë, në veçanti në zonën e Lazaratit.
Sipas këtij raporti, në vendin tonë problemi më i madh është krimi, mes të cilave veçohen grabitjet dhe vjedhjet me dhunë.
Sipas raportit në vitin 2014, krimi në përgjithësi dhe situata e sigurisë vazhdon të mbetet një shqetësim, duke nënvizuar se në 5 vitet e fundit, krimi ka vazhduar të rritet. Dhe pikërisht, rritjen më të madhe e kanë pasur vjedhjet, grabitjet dhe kallëzimet për dhunë në familje.
Por nga ana tjetër theksohet se krimet e dhunshme si vrasje, tentativa vrasje, grabitje me forcë, plaçkitje të armatosura, kanë pësuar rënie. Në këtë kuadër shpërthimet me eksploziv kanë pësuar rënie me 15%. Por janë ende alarmante shifrat e larta prej 72 shpërthimesh. Raporti bën të ditur se shumica e këtyre shpërthimeve kanë ndodhur në Fushë-Krujë. Shpërthimet kanë pasur si shënjestër individë të veçantë dhe që kanë qenë të lidhura me mosmarrëveshjet e brendshme mbi biznesin, krimet, ose në veprimtari politike dhe nuk kanë në shënjestër komunitetin ndërkombëtar.
Edhe pse vlerësohet puna e policisë shqiptare në luftën ndaj krimit të organizuar dhe trafikut të drogës, sërish sipas DASH krimi i organizuar ende vepron në Shqipëri.
