Drejtuesi i koalicionit ‘Djathtas për Zhvillim’, z. Dashamir Shehi, ka reaguar ashpër lidhur me videot e shkëmbyera mes Edi Ramës dhe Lulzim Bashës.
Në ‘Ditari i Pasdites’ me gazetaren Bruna Çifligu në A2 CNN, Shehi tha se Rama dhe Basha kanë harruar të bëjnë politikë, por e kanë mendjen te klikimet.
Ai shtoi se nuk do e lejonte veten të binte në këto nivele që sipas tij janë vulgare, pasi vlerëson se politikani gjykohet për punët e shtetit dhe jo për gallatë e degradim.
Shehi shkoi edhe më tej kur tha se gallatat Rama-Basha ia kanë kaluar edhe vulgaritetit në TikTok e ‘Big Brother’ dhe sipas tij, po edukojnë keq brezin e ri.
“Basha këto që po bën dyshoj se po i bën nga vëmendja që merr. Unë nuk do e bëja kurrë. Ne gjykohemi këtu për punën e shtetit, jo për meme.
Të dy, ky dhe ai tjetri që është kryeministër e kanë degraduar politikën në këto lloj nivele, unë sdo e bëja kurrë as për një milionë klikime të bija në këtë nivel gallate.
Kot i bien në qafë rinisë së Big Brother dhe Tik Tok. Këto i edukojnë rininë me këto që bëjnë. Policia jonë në fakt është dramatike dhe tragjike. Unë s’jam kundër që ata ta pranojnë sensin e humorit. Por jo në këto lloj nivelesh”, tha Shehi
