Çifti mbretëror i Holandës ka organizuar darkën madhështore për Samitin e NATO-s, mbrëmjen e së martës. Krerët e shteteve, mes të cilëve edhe kryeministri Edi Rama, realizuan foton tradicionale familjare përpara pallatit mbretëror Huis Den Bosch në Hagë, duke shënuar nisjen zyrtare të Samitit.
Ndryshe nga pjesa tjetër e liderëve, kreu i qeverisë sonë kishte zgjedhur një kostum të bardhë për këtë darkë.
Ndërkohë, Presidenti ukrainas Volodymyr Zelensky, pas shumë kohësh u pa me kostum.
Presidenti francez Emmanuel Macron përshëndeti Mbretëreshën Maxima dhe Princeshën e Kurorës Amalia duke i puthur duart.
Çështja kryesore e Samitit është rritja e shpenzimeve për mbrojtjen, në nivelin 5% të PBB-së, që pritet të diskutohet dhe miratohet. Pas nisjes së luftës në Ukrainë, shumë vende të NATO-s arritën objektivin minimal prej 2%, por Trump vijoi të këmbëngulte për nivelin 5%.
