Kryeministri Edi Rama dhe aleati kryesor në qeverisje, Ilir Meta zhvilluan një takim për rreth 4 orë në një nga restorantet te ‘Pazari i Ri’ në Tiranë.
Takimi mes kryeministrit dhe kryetarit të Kuvendit, ku pjesë e tryezës ishin edhe Erion Veliaj me Petrit Vasilin nisi rreth orës 21:00 dhe përfundoi në orën 01:00 pas mesnate.
Në qendër të diskutimit mes dy aleatëve në qeverisje ishte rinovimi i koalicionit edhe për një tjetër mandat, por ende nuk dihet se çfarë është vendosur në përfundim të 4 orëve.
Nga takimi i pari doli i kryeministri Rama me kryebashkiakun Erion Veliaj, ndërsa disa minuta pas tij u largua edhe kryetari i Kuvendit, Ilir Meta me Petrit Vasilin.
Të dy palët, si Rama edhe Meta nuk kanë pranuar që të japin prononcime për mediat që ishin të pranishme, por u mjaftuan me një buzëqeshje duke lënë mister fatin e koalicionit, nëse do të vazhdojë me një marrëveshje të re parazgjedhore apo jo.
Takimi mes Ramës dhe Metës erdhi një ditë pas 1 Prillit, data e marrëveshjes së 4 vite më parë dhe pak orë pas ftesës që Rama i bëri kryetarit të LSI gjatë punimeve të Asamblesë së PS.
Rama u shpreh se socialistët janë gati, ndërsa i takon LSI për të vendosur. Por për të mësuar nëse Meta ka pranuar apo jo për të vazhduar bashkëqeverisjen duhet të pritet për të zbardhur takimin mes dy palëve.
Prodhime deti dhe verë speciale për dy liderët
Para katër vjetësh kur arritën marrëveshjen për koalicionin Edi Rama dhe Ilir Meta darkonin në Gjirin e Lalzit me ngjala, ndërsa 4 vite më pas janë takuar sërish për të darkuar, besnik të menusë, por me një ndryshim të vogël, jo ngjala, por peshk.
Gatimi me prodhime deti për dy liderët e shumicës qeverisëse u shoqërua me verë speciale, e cila u soll në restorant nga një njëra nga makinat shoqëruese të kryeministrit Rama
Rama me Metën bashkë me dy shoqëruesit Veliaj dhe Vasili darkuan në katin e tretë të restorantit te Pazari i Ri.
Zona rreth restorantit ishte e blinduar nga Garda e Republikës që nuk lejonte në asnjë moment që të afrohej askush, ndërsa interesi nga mediat ka qenë maksimal.
