Rreth 20 anëtarë të grupit të tifozëve të përfaqësueses së Kosovës “Dardanët”, të premten qëndruan në një pjesë të tribunave të stadiumit “Antalya Arena” të Antalyas.
Për rreth 15 minuta sa edhe iu lejua të jenë të pranishëm në stadiumin, ku të shtunën (sot) Kosova do ta luajë ndeshjen e katërt eliminatore për botërorin “Rusia 2018” kundër Turqisë, përkrahën futbollistët e Kosovës me këngë dhe thirrje “Kosova-Kosova”, shkruan Koha Ditore. E përkrahje të madhe premtojnë se do t’i japin edhe në ndeshjen kundër Turqisë.
Grupi i tifozëve në përkrahje të përfaqësueses të premten në mëngjes mori rrugën nga Prishtina për në Antalya me të vetmin qëllim – ta përkrahë maksimalisht Kosovën, sikur edhe në ndeshje me Finlandën dhe Kroacinë. (b.an)
