Danimarka ka thënë se do të përshpejtojë një paketë ndihme ushtarake prej 241 milionë eurosh për Ukrainën, pasi një fregatë ruse qëlloi drejt një helikopteri ushtarak danez, në atë që Kopenhageni e dënoi si një “provokim të rëndë rus”.
Incidenti ndodhi të hënën dhe e shtyu Danimarkën të thërriste ambasadorin rus lidhur me incidentin, ndërsa NATO e përshkroi atë si një “një tjetër veprim të papërgjegjshëm rus”.
Shumica e fondeve do të shkojnë për sistemet e mbrojtjes ajrore të prodhuara në Ukrainë, tha të premten Ministri i Jashtëm danez Lars Lokke Rasmussen, pasi Komiteti i Politikës së Jashtme i parlamentit mbështeti paketën.
Ministri shtoi se incidenti me fregatën, i cili ndodhi në ujërat ndërkombëtare në jug të Danimarkës, ishte pjesë e një fushate më të gjerë nga Moska për të frikësuar aleatët evropianë të Ukrainës.
“Është pjesë e një modeli më të gjerë evropian ku Rusia përshkallëzon situatën dhe vazhdimisht teston kufijtë në përpjekje për të tronditur bashkëpunimin dhe mbështetjen tonë për Ukrainën”, tha ai.
“Ne nuk duam që kjo të ketë sukses. Nëse mendoni se mund të na provokoni që të mos e mbështesim Ukrainën, atëherë gaboheni”, shtoi Rasmussen.
Duke përdorur një ton të ngjashëm, ministri i mbrojtjes i Danimarkës, Jeppe Bruus, tha: “Nëse rusët mendojnë se mund të na tronditin duke bërë këtë lloj gjëje, atëherë kundërpërgjigjja jonë është se ne do ta rrisim mbështetjen tonë për Ukrainën më shpejt nga sa kishim ndërmend.”
Ministri rus i Mbrojtjes, Andrey Belousov, më vonë i dha një medalje komandantit të fregatës për parandalimin e asaj që Moska e përshkroi si një “provokim” nga helikopteri danez.
Danimarka i ka ofruar Ukrainës rreth 10.3 miliardë euro mbështetje ushtarake që nga pushtimi në shkallë të plotë, duke përjashtuar kontributet e saj përmes Bashkimit Evropian, duke e bërë atë një nga donatorët më të mëdhenj të Kievit në krahasim me madhësinë e ekonomisë së saj.
Ndihma e fundit vjen ndërsa Kievi përpiqet të mbrohet kundër raketave balistike dhe të lundrimit ruse për shkak të mungesës së interceptorëve të përshtatshëm, përfshirë raketat Patriot të prodhuara në SHBA .
