Kryeministrja daneze Mette Frederiksen deklaroi të dielën se marrëveshja e fundit mes Danimarkës, Groenlandës dhe Shteteve të Bashkuara respekton “vijat e kuqe” të Mbretërisë së Danimarkës, përfshirë sovranitetin dhe të drejtën e banorëve të Groenlandës për vetëvendosje.
“Ka qenë absolutisht thelbësore për ne, me dëshirën për të forcuar sigurinë në botën shumë të trazuar në të cilën jetojmë, që vijat tona të kuqe të respektohen”, tha Frederiksen për transmetuesin danez TV 2.
Sipas saj, gjatë negociatave, rëndësi të veçantë kishte forcimi i sigurisë në Arktik, si dhe respektimi i interesave thelbësore të Danimarkës dhe Groenlandës.
“Mbretëria e Danimarkës është një shtet sovran dhe e drejta e groenlandezëve për vetëvendosje duhet të respektohet në të ardhmen. Edhe ajo që ne e quajmë integritet territorial. E gjithë kjo përmbahet në këtë marrëveshje”, tha kryeministrja daneze.
Frederiksen nuk pranoi të jepte detaje mbi përmbajtjen e marrëveshjes, duke thënë se do të presë deri në nënshkrimin e saj.
Ajo tha se e kupton interesin e madh të banorëve të Groenlandës për atë që marrëveshja do të nënkuptojë për ta, pas një periudhe që e përshkroi si të vështirë.
“Nuk do ta vija firmën time, dhe as Jens-Frederik Nielsen, në një marrëveshje që nuk ishte e mirë për Groenlandën dhe mbretërinë”, deklaroi Frederiksen.
Kryeministrja daneze konfirmoi gjithashtu se do të takohet me presidentin amerikan Donald Trump në Nju Jork, ku pritet të nënshkruhet marrëveshja.
E pyetur nëse pret që Trump ta respektojë marrëveshjen, Frederiksen tha se supozon se të gjitha palët do ta zbatojnë atë.
“Ne kemi kaluar një kohë shumë, shumë të gjatë për këtë, si politikisht ashtu edhe diplomatikisht”, përfundoi ajo.
