Daniel Godelli nuk ngurron të akuzojë direkt ish-trajnerin e kombëtares shqiptare, Luan Shabani, si shkaktarin e kapjes së tij me doping. Në një prononcim të tijin për “TCH”, peqinasi shprehet se si në çdo sport force edhe ata konsumojnë proteina dhe kreatinë. “Federata na ka thënë që ‘pini çdo gjë që ju jep Shabani’. Neve ushqimi na vinte nëpër dhoma dhe shpërndahej me emra. Si në çdo sport force, edhe ne marrim proteina dhe kreatinë. Ne pimë çdo gjë që na dha Luan Shabani, pa ditur se çfarë kishte brenda. Në momentin që u kapa, unë Luanin e kam sharë dhe nuk kam kontaktuar më me të”, tregon Godelli.
Sportisti peqinas do të çlirohej më 10 dhjetor nga dënimi 2-vjeçar që mori pasi rezultoi pozitiv në Botërorin e vitit 2014, kur u shpall kampion bote. Godelli, ashtu si dhe Romela Begaj dhe Hysen Pulaku, rezultuan pozitivë me të njëjtën substancë të ndaluar “stanozolol” pas kontrollit “in competition” të kryer asokohe. Godelli në denoncimin e tij hedh dyshime se në këtë rast ka qenë një dorë e ligë.
“Ishim 3 sportistë që u kapëm me të njëjtën substancë dhe kjo më bën që të dyshoj se ka qenë një dorë e ligë”, shton Godelli. Prej gati dy vitesh, aq sa ishte pezullimi i 25-vjeçarit Godelli, fituesi i shumë medaljeve ndërkombëtare vazhdon stërvitjen me të njëjtat ritme, për të ngritur sërish lart emrin e tij si sportist elitar, bashkë me flamurin.
Dhe sfida e radhës së tij në pedanë do të jetë kampionati europian për të rritur, që do të zhvillohet në datat 1-9 prill në Split të Kroacisë. Në një postim të tijin në rrjetin social “Facebook” të pak ditëve më parë, Godelli do të shprehej se është gati të sfidojë këdo për të justifikuar rezultatet e tij. “Dhe nëse është dikush, i cili dyshon te rezultati im, atëherë edhe tani e ftoj në pedanë cilindo sportist dhe në tribunë cilindo person që ka dyshim tek aftësitë e mia”.
ma.me
