Ministria e Arsimit ka reaguar publikisht pas daljes në internet të tezës së provimit të Gjuhë-Letërsisë për Maturën Shtetërore.
Në reagimin e Ministrisë së Arsimit thuhet se publikimi i tezës nuk e cënon vazhdimësinë e procesit.
“Ministria e Arsimit dhe Sportit garanton se janë marrë të gjitha masat e nevojshme për të siguruar mbarëvajtjen e procesit të provimeve dhe për të ruajtur integritetin e tij të plotë. Publikimi i tezës së provimit të lëndës Gjuhë shqipe dhe Letërsi, pas fillimit të procesit të testimit nuk e cënon aspak ecurinë dhe besueshmërinë e procesit të provimit të Maturës Shtetërore. Rreth 27 mijë maturantë, në 145 qendra provimi në të gjithë vendin, po zhvillojnë provimin e Gjuhës Shqipe dhe Letërsisë në kushte të qeta dhe në përputhje me të gjitha standardet e sigurisë të parashikuara në rregulloren e Maturës.
Institucionet arsimore, në bashkëpunim me MAS-in, mbeten të angazhuara për të ofruar një proces të drejtë, të barabartë dhe transparent për çdo maturant”, njofton Ministria e Arsimit.
Teza e provimit të Gjuhës Shqipe dhe Letërsisë u publikua në Facebook vetëm 20 minuta nga orari zyrtar i nisjes së provimit.
