Nëse Greqia do ta përfundojë aventurën e saj brenda zonës Euro, çka do të vendoset më së shumti të dielën, monedhat në qarkullim nuk do të ndryshojnë pamjen e jashtme. Fjala është për mbishkrimet në gjuhën helene, të cilat afishohen në cepat e kartmonedhave euro. Ky është vendimi që filtron nga ambjentet diplomatike e financiare.
Pas këtij detaji qëndron në fakt një histori e gjatë debatesh mes palës greke dhe homologëve europianë. Kur në vitin e largët 1997, ministri grek i financave Papaantoniu, kishte kërkuar futjen e mbishkrimit grek në kartmonedhën europiane që kishte startuar në 1995, të tjerët e kishin kundërshtuar. Kolegu i tij gjerman ishte shprehur se nuk do të fusnin në qarkullim kartmonedha me “gërma qesharake”.
Gjithsesi, kur Greqia hyri në zonën, në vitin 2000, e kishte fituar tashmë betejën. Gërmat greke zunë vend në kartmonedhat euro. Një fitore simbolike mbi Gjermaninë, 15 vjet para se kancelarja Merkel dhe kryeministri Cipras të kryqëzonin armët.
