Pamje të reja po qarkullojnë në rrjetet sociale nga grabitja e armatosur që ndodhi para dy ditësh në Ferizaj, në afërsi të pikës së karburanteve “Hib Petrol”, në bankomatet që ndodhen aty.
Në videot e publikuara në Tik Tok, shihen personat e armatosur duke vendosur eksploziv pranë bankomatit.
Nga hetimet e para, hetuesit kanë mësuar se synimi i personave të maskuar ishin 3 bankomatet që gjenden skaj rrugës magjistrale në parkingun e qendrës tregtare ” Superviva” në Ferizaj.
“Personat e maskuar fillimisht me një mjet plasës kanë shpërthyer njërin bankomat, ndërsa kanë dëmtuar edhe dy bankomatët tjerë, mirëpo falë intervenimit të shpejtë të policisë, posa arrijnë patrulla e parë policore, të dyshuarit fillojnë të shtënë në drejtim të veturës së policisë dhe të largohen nga vendi i ngjarjes”, kishte njoftuar policia. Rasti është cilësuar ” Vrasje e mbetur në tentativë, grabitje e armatosur e mbetur në tentativë dhe armëmbajtje pa leje.
Grabitja në Ferizaj
Dy zyrtarë të Policisë së Kosovës u sulmuan në Ferizaj nga katër persona që po tentonin të kryenin grabitje në në disa bankomate në magjistralen Ferizaj-Prishtinë. Armë AK-47 u përdorën për të kryer sulmin në drejtim të patrullës policore, e dyshimet e para thonë se katër të dyshuarit që ishin të pajisur me armë të gjata, ikën nga vendi i ngjarjes në një drejtim të panjohur me një veturë karavan, ngjyrë e zezë.Të dyshuarit ende nuk janë gjetur, e hetuesit policorë janë duke vazhduar punën për identifikimin e kapjen e tyre. E gjithë ngjarja ndodhi më 3 nëntor rreth orës 4:50, gjatë një tentim grabitjeje të armatosur te pika e karburantit të “Hib Petrol” në magjistralen Ferizaj-Prishtinë.
