Ky është momenti kur 34-vjeçari Asqeri Mandri përplaset fizikisht me gruan e tij të cilën dyshohet se e mbante të izoluar në banesë dhe e monitoronte me kamera sigurie.
Tv Klan ka siguruar pamjet ekskluzive ku siç shihet 34-vjeçari mban në prehër 1 prej 4 fëmijëve të mitur teksa debaton me gruan e tij.
Pasi shkëmben disa fjalë Asqeri Mandri çohet dhe shtyn gruan e tij, e cila gjithashtu i kundërpërgjigjet duke shtyrë 34-vjeçarin.
Mbi dyshimet për dhunë dhe këto pamje filmike, Policia e Tiranës ka vënë në pranga 34-vjeçarin.
“Banesa pas krahëve të mi ishte ambienti ku 34-vjeçari mbante të izoluar dhe nën monitorimin e kamerave gruan e tij dhe 4 fëmijët e mitur”, raporton gazetari i Tv Klan Merin Maçi.
Mandri u kallëzua për dhunë nga bashkëshortja e tij, e cila vetëm disa orë më vonë hodhi poshtë këto akuza.
Sa i takon denoncimit të referuar në polici, e reja tha se nuk ka qenë mirë në momentin që ka bërë kallëzimin.
Pavarësisht këtij qëndrimi, policia ka dyshime se e reja është dhunuar nga bashkëshorti, dhe për këtë thotë se disponon prova mes të cilave dhe pamje filmike që provojnë atë.
34-vjeçari ishte kthyer nga Gjermania vetëm pak ditë më parë, ndërsa kohët e fundit kishte shfaqur shenja xhelozie dhe dyshonte se gruaja e tij e tradhtonte. Këtë version jep edhe nëna e 34-vjeçarit e cila gjithashtu mohon dhunën.
Në harkun kohor të dy javëve ky është rasti i dytë i regjistruar në kryeqytet ku gra e fëmijë izolohen në banesë dhe monitorohen me kamera sigurie. Po për të njëjtën akuzë më 26 Janar u vu në pranga edhe Jetnor Zhabolli.
/a.r
