Matura Shtetërore 2020 ka ndryshime. Mësohet se provimet do të korrigjohen në mënyrë elektronike, ndërsa nxënësit do të quhen kalues vetëm nëse kalojnë 25% të tezës, në dallim ku pragu i kalueshmërisë ka qenë më i ulët. Zv/ministrja e Arsimit, Sportit dhe Rinisë, Nina Guga shpjegoi për ”ATSH”, risitë e provimeve të maturës 2020. Sipas saj, edhe pse testi do të përmbajë 60 pyetje dhe periudha kohore është po e njëjta me vitin e kaluar, pra 2 orë e gjysmë, jo vetëm pyetjet me alternativa do të korrigjohen online por edhe pyetjet e hapura.
”Matura Shtetërore 2020 edhe sivjet do të vijojë me 4 provime nga të cilat 3 janë provime të lëndëve të detyruara dhe 1 provim i lëndëve me zgjedhje. Ndryshimi nga matura 2019 në 2020 ka të bëjë me disa momente të rëndësishme. Pavarësisht se testi është 60 pikësh dhe afati kohor është 2 orë e gjysmë. Sivjet risi është vlerësimi elektronik i provimeve të maturës. Nëse vjet ishte mënyra elektronike vetëm për pyetjet me alternative, sivjet është futur edhe mënyra e vlerësimit elektronik edhe për pyetjet e hapura. Çdo mësues do ta ketë përpara tezën e provimit dhe do ta korrigjojë nëpërmjet ekranit testin”.
Nga ana tjetër ajo theksoi se rezultati i provimeve për maturantët, këtë vit do të dalë më herët, falë korrigjimit dixhital. ”Teza e provimit nuk do të korrigjohet nga lexuesi optik por do ta lexojë përsëri një mësues përpara ekranit. Sigurimi i një korrigjimi të tillë në mënyrë të tillë ka shumë avantazhe. Së pari ngre cilësinë e korrigjimit, minimizon gabimet njerëzore dhe jep shpejtësi në korrigjim në mënyrë që nxënësi ta ketë më shpejt rezultatin”.
Këtë vit po ashtu, do të rritet numri i administratorëve në provime. Nga ana tjetër, diploma do të merret me herët se çdo vit tjetër. Sipas zv.ministres, në 1 korrik maturantët do të pajisen me diplomën e pjekurisë. Guga i uroi suksese të gjithë maturantëve.
Datat e provimeve
Gjuhë e huaj-8 qershor 2020
Gjuhë shqipe-11 qershor 2020
Matematikë-15 qershor 2020
Provimi me zgjedhje-18 qershor 2020 /e.s/
