Kryebashkiaku i Durrësit Vangjush Dako ka zhvilluar një takim edhe me biznesin dhe banorë të fshatit Vadardhë të bashkisë së Sukthit.
Dako ka deklaruar para banorëve të zonës, se shumë shpejt, në muajin janar- shkurt të 2016, nis puna për rikonstruksionin e rrugës së re nga autostrada deri në bregdet, ndërsa shtoi se të gjitha rrugët dytësore dhe midis lagjeve të Sukthit gjithashtu do të rikonstruktohen. Dako ka deklaruar para banorëve të Vadardhës se do të aplikohet menjëherë ulja e taksës së pasurisë për biznesin në masën 30 përqind dhe po 30 përqind do të ulet edhe taksa vendore për popullatën.
Kandidati i Aleancës për Shqipërinë Evropiane për bashkinë e Durrësit Vangjush Dako ka dhënë edhe një përgjigje për komentet që janë bërë nga kampi opozitar në lidhje me premtimin për përjashtimin nga taksat për tre vjet për bizneset që investojnë mbi 1 milion euro në bujqësi.
Dako tha se: “ në këtë angazhim ne nuk flasim për biznese të vogla të cilat i kemi mbështetur gjithmonë dhe do të vazhdojmë ti mbështesim, por për investime nga sipërmarrës të mëdhenj në mënyrë që ti orientojmë ata drejt bujqësisë, pasi me investime të tilla do të hapen shumë vende të reja pune. Pra ky angazhim që do ta vëmë në zbatim që në fillim të mandatit, i drejtohet biznesit të madh për të rritur ekonominë e këtyre zonave”.
