Kryetari i Bashkisë së Durrësit Vangjush Dako i është bashkuar nismës së Green Albania për pastrimin e bregdetit. Me dhjetëra të rinj vullnetarë kryebashkiaku Vangjush Dako dhe prefekti Roland Xhelilaj kanë marrë pjesë në pastrimin e bregdetit të Durrësit. Kryebashkiaku Dako theksoi se mbajtja pastër e mjedisit krijon kushtet për një zhvillim të qëndrueshëm ndërkohë që ka deklaruar se shumë shpejt do të ndërtohet landifilli për të gjithë Durrësin: “Vlerësim dhe falenderim për iniciativën e “Green Line Albania”. Pa një mjedis të pastër nuk mund të kemi një zhvillim turistik të qendrueshëm. Prandaj duhet ta ruajmë mjedisin në cdo ditë, të kujdesemi për ta mbajtur atë pastër, që të kemi një turizëm më të mirë, të kemi më shumë turistë që zgjedhin bregdetin në Durrësit, për të kaluar pushimet. Në katër vitet e ardhshme do të bëjmë edhe më shumë për mbajtjen pastër të bregdetit, do i kushtojmë vëmendje zhvillimit të turizmit. Do të zgjidhim përgjithmonë problemin e landfillit që do të shërbejë për të gjithë zonën e Bashkisë së re të Durrësit. Gjithashtu në 4 vitet e ardhshme, do të mbjellim 7 mijë pemë të reja, që do të shërbejnë jo vetem për dekorin e qytetit por edhe për pastrimin e ajrit dhe krijimin e hapsirave të gjelbërta. Pa bashkëpunimin dhe sensiblizimin e popullatës që të mbajë pastër mjedisin dhe për cdo ditë sëbashku të kujdesemi për të, nuk mund të pretendojmë të kemi një mjedis të pastër”
