Daily Mail i ka dedikuar një artikull turistëve britanikë në Shqipëri duke theksuar se vendi ynë po përjeton një “bum” turizmi falë plazheve piktoreske, hoteleve dhe restoranteve të lira.
Më shumë se 120 mijë shtetas të Mbretërisë së Bashkuar janë tashmë vizitorë të rregullt të rivierës shqiptare dhe jo vetëm. Pjesa malore e gadishullit ballkanik do të jetë edhe më tërheqëse për britanikët këtë dimër kur Ryanair dhe Wizz Air të nisin fluturime të reja.
Muajin e kaluar u kërkua më shumë për udhëtime nga Mbretëria e Bashkuar në Shqipëri që nga fillimi i vitit 2022 dhe kërkimet muajin e kaluar ishin 58 për qind më shumë se në korrik të një viti më parë.
Hulumtimi i MailOnline sot ka dalë në konkluzionin se mesatarja e një vakti për dy persona në një restorant të nivelit të mesëm në Shqipëri është vetëm 29 £ në total, ndërsa një birrë do të kushtojë mesatarisht 1.67 £.
Destinacionet më të lira të njohura në Shqipëri për një vakt duket se janë Shkodra dhe Vlora ku dy persona, sipas Daily Mail duhet të paguajnë vetëm 21 £, ndërsa vendi më i lirë për një birrë është Berati me 80 pence.
Të dhënat e përpiluara nga databaza e kostos së jetesës Numbeo zbulojnë gjithashtu se Tirana është vendi më i shtrenjtë për një vakt jashtë, por është sidoqoftë lirë për britanikët që duhet të paguajnë 33 £ për dy persona.
Hotelet janë gjithashtu me çmime shumë të arsyeshme, me të dhënat e Booking.com që tregojnë se hotelet në Tiranë kushtojnë vetëm 41 £ nata për tre yje, 60 £ për katër yje dhe 116 £ për pesë yje.
Akomodimi edhe më i lirë mund të gjendet në qytetin piktoresk mesjetar të Beratit, ku një hotel me tre yje kushton mesatarisht vetëm 31 £ në natë. Ndërsa inflacioni i lartë vazhdon të shkaktojë një krizë të kostos së jetesës në Britani, shumë familje po kërkojnë opsione më të përballueshme kur planifikojnë pushime jashtë vendit.
Shqipëria po shijon aktualisht vitin e saj më të suksesshëm të turizmit deri më tani, pasi ka pritur 3.4 milionë shtetas të huaj gjatë gjashtë muajve të parë të këtij viti.
Bëhet fjalë për një rritje prej 33 për qind në vitin 2022, sipas Institutit të Statistikave. Sipas të dhënave vetëm qershori pati më shumë se një milion vizita, 15 për qind më shumë se në të njëjtën periudhë të vitit të kaluar.
Rritja është e lartë në krahasim me vitin 2010 kur Shqipëria priti vetëm 1.28 milionë turistë të huaj gjatë gjithë vitit.
Në vitin 2019, pati gati 3.3 milionë turistë në Shqipëri për të gjithë vitin, por tani një numër i ngjashëm po hyn në vend në vetëm gjashtë muaj.
Sipas ekspertëve që citon Daily Mail, Shqipëria konsiderohet jo vetëm si një destinacion tërheqës dhe ekonomik, por dhe shumë popullor.
