Në mbledhjen e djeshme të grupit parlamentar të PS-së, deputetja Arta Dade ka kërkuar dërgimin e Sali Berishës në Prokurori.
Debatet në mbledhjen e PS-së
Edi Rama: Falënderoj asamblenë për mbështetjen që i dha listës së Kryesisë. Falënderoj me mirënjohje Namik Doklen për gjithçka ka dhënë si anëtar i kryesisë për 25 vjet me radhë dhe me gjestin e tij kuptimplotë të tërheqjes nga lista e propozuar për t’i hapur rrugën të rinjve. Falënderoj dhe për mbështetjen e çmuar që kam gjetur te Namik Dokle sidomos në momentet e vështira në detyrën time si kryetar i PS-së. Ndërsa duke u ndalur te ajo që prodhoi asambleja, dua të them se ripërtëritja e këtij forumi dhe kryesisë janë një premisë pozitive për të ecur me sukses përpara. I bëj thirrje përfaqësisë së re që të jetë në lartësinë e duhur. Jemi në një fazë historike për vendin, që përkon me rikonfirmimin e mandatit tonë qeverisës vitin e ardhshëm. Të nisim dialogun e ri me Shqipërinë, që duhet të nisë nga baza e PS-së dhe të vazhdojë në çdo cep të Shqipërisë. Ka përfunduar ristrukturimi i plotë i PS-së. Do të ketë garë për kryetarë të rinj në bazë të ndarjes administrative- territoriale. Nuk do kenë poste të tjera përveç pozicioneve që do paguhen në parti. Kështu do të funksionojë edhe në vazhdimësi. Takimi ishte i pari pas zgjedhjeve. Ishte një takim, ku fillon edhe puna konkrete për çdo sekretariat.
Arta Dade: Në letrën që firmosa për Byronë kishte 3 kërkesa. Ndërkohë është plotësuar vetëm një dhe më minimalja. Përse nuk është dërguar në prokurori?
Gramoz Ruçi: Zonja Dade, Prokuroria mund të nisë hetimin pasi seanca ka qenë publike dhe në transmetim direkt në shumë televizione. Vendimi për këtë kërkesë është marrë në grup.
Arta Dade: Atëherë pse ndryshuat mendje? Unë firmën e kam hedhur për të çuar Berishën në prokurori.
Gramoz Ruçi: Masa është marrë brenda mundësive institucionale, sipas rregullores së Kuvendit të Shqipërisë, për të mos lejuar për dhjetë ditë, atë që bëri thirrje për marrjen e armëve që të jetë pjesë e punimeve të kuvendit.
Arta Dade: Pyetja që shtroj unë është, kryesia a ka mendim për ta çuar në prokurori?
Debate për çështjet e ekonomisë
Edi Rama: Gjatë vitit 2015 u rritëm me 2.62 % dhe mund të ishim rritur më shumë, nëse për shkak të konjukturës ndërkombëtare dhe nëse në radhë të parë prej çmimit të naftës dhe të mineraleve, nuk do të kishim pësuar një goditje që u bë e plotë edhe për shkak të përmbytjeve të mëdha në tremujorin e parë të vitit që lamë pas.
Erjon Braçe: Dua të ndaj me ju një shqetësim, atë të mungesës së deputetëve në komisionin që unë drejtoj. Dua të them se shpesh kam qenë i pakënaqur me angazhimin jo aq sa duhet të ministrave për të mbrojtur ligjet e qeverisë në Kuvend. Po ashtu jam i pakënaqur me pjesëmarrjen e deputetëve në komisione. Është e pafalshme që deputetë të caktuar gjatë gjithë sesionit të marrin pjesë vetëm në nisjen e sesionit të ri parlamentar. Më sillni deputetët në komisione. Po më bllokojnë punën e Komisionit, ka të tjerë që presin në radhë.
Paulin Sterkaj: Meqë jemi te diskutimi për ekonominë duhet të hapet një zyrë e QKR-së në Malësi të Madhe. Po ashtu është janë lënë pas dore edhe investime në rrjetin energjetik në Malësi të Madhe. Në Malësi të madhe të investohet në rrjetin energjetik. Qeveria duhet të marrë masa edhe për këtë zonë, e cila ka mjaft resurse për të investuar. Këtë kërkesë ia kam parashtruar edhe personalisht kryeministrit të vendit, në kuadër të takimeve me deputetët e çdo qarku, por, duke parë që nuk ka pasur asnjë investim, mendova që ta shtroj dhe në mbledhjen e grupit.
