Ministri i Jashtëm i Serbisë, Ivica Daçiq, ka thënë se nëse Vatikani njeh pavarësinë e Kosovës, atëherë fajtor do të jetë ish-presidenti i Serbisë, Tomisllav Nikoliq. Ai është shprehur kështu, duke iu përgjigjur akuzave që i janë bërë pse ka ftuar Papa Franciskon që të vizitojë Serbinë, transmeton Koha.net.
“Nuk i kam bërë dëm shtetit duke shpallur të vërtetën mbi vizitën e Papës, por dëmin e ka bërë Tomisllav Nikoliq kur njëherë e ftoi e pastaj hoqi dorë nga vizita e prijësit të Kishës Katolike”, u shpreh Daçiq duke reaguar ndaj akuzave të ish-shefit të shtetit.
Nikoliq i kishte thënë të përditshmes së Beogradit, “Novosti” se Daçiq “i ka shkaktuar dëm shtetit, përmes veprimit jo diplomatik, duke nxjerrë në opinion korrespondencën e presidentit të Serbisë me Papën e Kishës Katolike” pa e pyetur Kishën (Kishën ortodokse serbe). “Nëse është dashur ta pyeste Kishën, pse nuk e kishte pyetur para se t’i dërgonte ftesën” për vizitë, i është përgjigjur Daçiq, po në “Novosti”.
“Kështu dalim joseriozë . Ndërsa Papa nuk është vetëm lider fetar, por edhe shef i shtetit që nuk e ka njohur Kosovën dhe që është me shumë rëndësi në luftën për krahinën tonë jugore . Ja që do të lejojmë që Papa të shkojë në Prishtinë dhe të mos vijë në Beograd. Atëherë mos të ankohemi nëse Vatikani e njeh Kosovën”, është shprehur Daçiq, transmeton Koha.net.
Vizita e Papës në Serbi ishte llogaritur në janar të vitit 2016. Nga Vatikani atëherë ishte konfirmuar 21 e 22 maji si data të vizitës, ndërkohë kishte mbërri nota me të cilën propozohej që delegacioni i Vatikanit të arrinte në Beograd më 24 janar për të nisur përgatitjet. Por në Serbi atëherë u shpallën zgjedhjet dhe kjo u përdor si shkas për heqjen dorë nga vizita e Papës. (b.an)
