Diella, ministrja virtuale që do të mbulojë prokurimet publike, ka tërhequr vëmendjen e mediave ndërkombëtare. Një koncept i ri, i prezantuar për herë të parë gjatë mbledhjes së Asamblesë së Partisë Socialiste ku u zbuluan emrat e kabinetit të ri të qeverisë.
Nëse implementohet, kjo do të jetë hera e parë që një qeveri i jep një post zyrtare një IA, shkruan Cybernews.
Më tej, artikulli parashtron dilemën. Vërtet, Diella nuk do të marrë ryshfet, por a do të mundet ajo të marrë përgjegjësi të plotë për vendimmarrjen apo thjesht do të ndihmojë qeverinë.
Në shkrim, bëhet një përmbledhje e progresit të Diellës nga një mjet i thjeshtë pyetjesh e përgjigjesh në platformën e-Albania në një chatbot të Inteligjencës Artificiale, me avatarin e saj që mund të ndërveprojë me zë e figurë.
Në mes të 2025, shqiptarët mund të aplikonin për rinovimin e kartës së identitetit thjesht përmes ndërveprimit zanor sesa klikimit nëpër formularë, vijon artikulli, duke shpjeguar se funksionon falë Azure OpenAI të Microsoft.
Në një pikë tjetër, vihet në dukje se një ministër duhet të betohet para presidentit kur merr detyrën e re.
Dikush mendon sesi një chatbot mund të betohet dhe nëse avatari do të merrte një detyrë përmes të folurit sintetik. Recitimi nuk do ta lidhte IA me betimin në formën që kërkon Kushtetuta. Ndoshta Diella do të përshkruhej më mirë si një drejtues teknik me njerëz pas saj, shkruan Cybernews.
Dhe nëse IA gabon me një element prokurimi, mbetet e paqartë se kush do të mbajë përgjegjësi: Rama, ekipi i teknologjisë apo Microsoft.
Diçka është e sigurt: Nëse presidenti Bajram Begaj miraton Diellën, mbetet për t’u parë nëse qytetarët shqiptarë do të munden të kundërshtojnë apo akuzojnë një ministër prej Inteligjencës Artificiale apo do të mbeten duke bërtitur drejt ekranit pa askënd që t’u përgjigjet, përfundon artikulli.
