ÇUDIA/ Karta e identitetit në mikrovalë për të mos u gjurmuar
Dëshmitë e ish-punonjësit të shërbimeve sekrete Eduard Snouden për gjurmimin e jetës private të njerëzve, kanë bërë efekt tek një pjesë e perëndimorëve. Policia e aeroportit të Frankfurtit ndaloi këto ditë një burrë, i cili donte të kalonte kufirin me një kartë identiteti që rezultoi se ishte futur në… furrën me mikrovalë.
Kjo çmenduri ka ndodhur për shkak se një teori komploti e përhapur në internet thotë se nëse e fut kartën e identitetit në furrën me mikrovalë, karta jote bëhet e pagjurmueshme nga policia dhe shërbimet sekrete. Autoritetet kufitare në Perëndim njoftojnë gjithnjë e më shumë raste kur persona të caktuar kapen në pikat kufitare, pasi kartat e tyre rezultojnë të pavlefshme, për shkak se i kanë futur në mikrovalë. Një modë e habitshme, në përpjekje për të ruajtur në mënyrë naive jetën private, por që nuk ka një fund të mirë për ata që i besojnë. Pasi mbetesh pa dokument identifikimi.
