Kryesuesi i PS në qarkun e Gjirokastrës Bledi Çuçi ka reaguar ashpër pas intervistave te Presidentit të zgjedhur, Ilir Meta dhe deputetit të LSI Vangjel Tavo në intervistat e dhëna nga këto të fundit në kanalet televizive Greke. Nëpërmjet një postimi në rrjetin social Facebook, z. Çuçi thekson se në asnjë vend të botës nuk ndodh që Presidenti të ankohet për kryeministrin e vendit të tij në një shtet fqinj.
Gjithashtu, ai nuk kursen replikat me deputetin Tavo ku vë në dukje se ankesat për presion të policisë ndaj minoritarëve grekë ai nuk i ka bërë asnjëherë të ditura në Shqipëri por i përdor ato veçse për retorike përpara zgjedhjeve.
Më poshtë postimi i plotë i z. Çuçi:
“Eshtë e pabesueshme që Presidenti i zgjedhur të qahet në një televizion fqinj për kryeministrin e vendit, duke fajësuar haptaz kryeministrin Edi Rama për faktin se ai është i pari që ka guxuar të flasë hapur me fqinjët për çështje të bartura mes vendeve.
Kjo gjë nuk ndodh në asnjë republike në botë dhe është e paperceptueshme për mua, që për më tepër kam asistuar në mbledhjen e grupit parlamentar të PS kur Edi Rama kërkoi vote unanime për Ilir Metën President, si dhe kërkoi të ishin të pranishëm në seancë të gjithë ministrat, edhe pse nuk kanë të drejtë vote, por në respekt të një aleati e presidenti të ri të Republikës.
Pyes veten se çfarë borxhi i ka ky vend apo ky popull Ilir Metës, që të na tregojë në sytë e fqinjeve si një vend problematik e popull me “bisht”?! Cfarë kërkon më shumë Ilir Meta nga ky vend dhe nga ky popull, se nuk po them nga socialistët pasi intervista e tij më ka bërë të ndjehem keq si shqiptar, jo thjesht si socialist.
Nuk dua të hyj fare në konfliktin që Ilir Meta ka ndezur brënda vendit për hesap të partisë së tij, por eksportimi i këtij konflikti jashtë Shqipërisë, në vendin fqinj, është vërtetë e tepërt! Eshtë fyerje kombëtare sipas meje dhe sipas shumëkujt që më ka shprehur me një ndjesi skandalizimi përshtypjen për këtë veprim të pajustifikueshem të Presidentit të ri.
Të flasësh pas kësaj për deputetin Tavo që në një tjetër televizion grek, qahet në të njëjtën dite me Presidentin, për Policinë Shqiptare se po bëka presion mbi minoritaret, ndërkohe që këtë se ka thënë askund në shqip, mund të jetë e tepërt. Por në këtë qarkun tonë, kjo ngjan ca si shumë e tepërt për të qënë e rastësishme!
Kaq shumë i dhemb zotit President partia e tij sa Shqiperia nuk i hyn më në sy fare dhe është gati ta “shesë” për dy pare spec tek komshinjtë?!
Nuk e di pergjigjen, por di që Gjirokastra dhe Shqipëria duhet të mendohen shumë shumë mirë në 25 Qershor. Sepse për Presidentin mund të ketë kohë të marrim vesh çfarë e ka gjetur, por për Shqiperinë nuk ka asnjë kohë për të humbur me këdo që e ka te lehtë ta djegë atë si jorganin për një plesht! ” /a.ç
